მუხრან ბურჭულაძე: გავერთიანდეთ და ერთად გავცეთ პასუხი პუტინს

პოლიტიკა - 12:19, 29 Aug, 2014

2478

თუ არ შევაჩერეთ რუსეთი დღეს, ამის გაკეთება მოგვიწევს ხვალ და დაყოვნება დაჯდება გაცილებით მეტი ადამიანის სიცოცხლე. რუსეთი ყოველთვის ეცდება ელვისებური სისწრაფით მოახდინოს დამოუკიდებელი სახელმწიფოების ტერიტორიების ოკუპაცია, შელახოს მათი სუვერენიტეტი და მოიპოვოს მეტი გავლენა. მაგრამ დღეს ისევე როგორც 2008 წელს რუსეთის ღია აგრესია სწორედ დასავლეთის არასათანადო ქმედების შედეგია. ჩვენი ვალია პასუხი გავცეთ რუსეთის თავაშვებულ საქციელს და პასუხი უნდა იყოს უმკაცრესი, რომ ხვალ „T-72“-ს სხვაგან არ შევხვდეთ და რომ არ დარჩეს დანაშაული დაუსჯელი.

რაც შეეხება საქართველოს ოფიციალურ პოზიციას, თუ ჩვენ თავს ევროპული ოჯახის წევრად მივიჩნევთ, მაშინ უნდა მოვიქცეთ კიდეც როგორც ამ ოჯახის წევრები და რუსეთის წინააღმდეგ სანქციები დავაწესოთ. ჩვენი პარტნიორები ამისკენ მოგვიწოდებენ, ჩვენი პასუხი კი როგორც ჩანს „ერგნეთის“ ამოქმედებაა. გამორიცხული არაა საქართველო რუსეთისთვის ევროპული ნაწარმის ერთ-ერთი გამტარი გახდეს. რა შედეგი ექნება ფედერაციის იზოლაციას თუ მას ჩვენ გამოვკვებავთ? ამიტომაც ვამბობ რომ საქართველოს მთავრობა ნაცვლად მოკავშირეებისა რუსეთს უწვდის დახმარების ხელს.

მართალია მთავრობა ცდილობს ხალხის გადაკიდებას, ბოროტებისა და შუღლის თესვას რაც რუსული თამაშის გაგრძელებაა და ვიცით საიდანაც მოდის, მაგრამ ჩვენ გავერთიანდეთ და ერთად გავცეთ პასუხი პუტინს, უარი ვთქვათ რუსული პროდუქტის შეძენეზე, რუსულ ტაშფანდურში მონაწილეობაზე, ერთმანეთის სიძულვილსა და დევნაზე, ეს მაინც ხომ შეგვიძლია. გამარჯვება არა რევანშსა და შურისძიებაში არამედ ერთიანობაშია. ნაცვლად ერთმანეთთან დაპირისპირებისა უნდა გავერთიანდეთ საერთო მტრის წინააღმდეგ შიგნით თუ გარეთ და ერთად ვაიძულოთ ხელისუფლება გადადგას ნაბიჯები რომელიც არა მტერს არამედ ჩვენს ქვეყანას წაადგება" - აცხადებს მუხრან ბურჭულაძე.