გიორგი ვაშაძე უკრაინის მოვლენებზე განცხადებას ავრცელებს და კოლეგებს მიმართავს

პოლიტიკა - 19:29, 28 Aug, 2014

2776

,,ნაციონალური მოძრაობის“ წევრი გიორგი ვაშაძე განცხადებას ავრცელებს, სადაც ის მოუწოდებს თავის კოლეგებს, შეიმუშაონ ერთობლივი სამოქმედო გეგმა უკრიანელი ხალხის დასახმარებლად. ვაშაძე 31 აგვისტოს, 18:00 საათზე უკრაინაში მიმდინარე მოვლენებთან დაკავშირებით ინოვაციების და განვითარების ფონდის ოფისში შეხვედრას გამართავს (ჭავჭავაძის 23, მეორე სართული).

,,ევროპის შუაგულში კვლავ გრძელდება ბრძოლა თავისუფლებისათვის. უკრაინელმა ხალხმა საკუთარი სისხლის ფასად დაამარცხა იანუკოვიჩის რეჟიმი, ამით კი გამოხატა ნება იყოს სრულუფლებიანი წევრი ევროპის თავისუფალი თანამეგობრობის.

ისტორია მეორდება - ამ არჩევანისთვის უკრაინა ისევე ისჯება, როგორც საქართველო 2008 წელს.

ყირიმის ოკუპაციის შემდეგ, პუტინის რეჟიმმა შეაიარაღა ტერორისტები, რომლებმაც დაიწყეს სამხედრო აგრესია აღმოსავლეთ უკრაინაში, ხოლო გუშინ ღამით რუსეთმა დაიწყო პირდაპირი და ღია სამხედრო ინტერვენცია რეგულარული შენაერთების გამოყენებით.

დღეს უკრაინაში ერთმანეთს უპირისპირდება ტოტალიტარული და დემოკრატიული სამყარო. შესაბამისად, ამ გადამწყვეტ ბრძოლაში კი საქართველოს და თითოეული ჩვენგანის პოზიცია უნდა იყოს მკაფიო. ჩვენი პირდაპირი მოვალეობაა გვერდით დავუდგეთ უკრაინელ ხალხს, გადავდგათ ქმედითი ნაბიჯები აგრესიის შესაჩერებლად, რადგან ეს ბრძოლა ჩვენი ბრძოლაცაა.

თხოვნით მივმართავ ჩემს კოლეგებს, ერთობლივად შევიმუშავოთ განცხადება და მხარდაჭერის კონკრეტული სამოქმედო გეგმა.

მჯერა რომ ამ ბრძოლაში ჩვენ ერთად გავიმარჯვებთ.

ძალა ერთობაშია!

Слава Україні!“, - ნათქვამია გიორგი ვაშაძის განცხადებაში.