დარიალის ხეობა ქვისა და კლდის მასის ჩამონაშალისაგან სრულად გაწმენდილია

პოლიტიკა - 10:02, 28 Aug, 2014

716

დარიალის ხეობაში გზა ღვარცოფის შედეგად ჩამოტანილი ქვისა და კლდის მასის ჩამონაშალისაგან მთლიანად გაწმენდილია.

ამის შესახებ განცხადებას ინფრასტრუქტურის სამინისტრო ავრცელებს. უწყების ინფორმაციით, ამ ეტაპზე მიმდინარეობს მდინარე თერგის დაღრმავებისა და ბუნებრივ კალაპოტში დაბრუნების, ასევე, ნაპირსამაგრი და გზის აღდგენითი სამუშოები. სტიქიის სალიკვიდაციო სამუშაოებს შპს "სახელმწიფო სამშენებლო კომპანია" ახორციელებს.

რეგიონული განვითარებისა და ინფრასტრუქტურის მინისტრი დავით შავლიაშვილი, მისი პირველი მოადგილე გიორგი ამაშუკელი და საავტომობილო გზების დეპარტამენტის თავმჯდომარე ვაჟა ფანჩულიძე დარიალის ხეობაში იმყოფებიან და დამეწყრილ ზონაში არსებულ ვითარებას ადგილზე ეცნობიან.

20 აგვისტოს, მცხეთა-სტეფანწმინდა-ლარსის საავტომობილო გზის 134-ე კმ-ზე მთისა და კლდის მასის ჩამონაშალმა მდინარე თერგს კალაპოტი შეუცვალა, გადმოსულმა მდინარემ არსებულ საავტომობილო გზას საფუძველი გამოაცალა და ლარსის გამშვები პუნქტი დააზიანა. მეწყერი 2 კმ გზაზე ჩამოწვა, საიდანაც 1 კმ, რომელსაც საფუძველი მდინარემ გამოაცალა, ნაპირსამაგრ, აღდგენით და მოწყობით სამუშაოების ჩატარებას საჭიროებს.