იქნება თუ არა აშშ ფაქტორი ღარიბაშვილისთვის ალასანიას შემთხვევაში მაინც...

პოლიტიკა - 15:35, 26 Aug, 2014

2224

„ქრონიკა+“ მინისტრთა კაბინეტში მოსალოდნელ მორიგ საკადრო წმენდის შესახებ წერს და შესაძლო ცვლილებების მიზეზად ორ რამეს ასახელებს, პირველი - პრემიერს ძალაუფლების შენარჩუნებისთვის მისთვის რამდენიმე არასასურველი მინისტრის მოშორება სჭირდება და მეორე- მმართველ გუნდს უნდა ჩამოშორდეს მინისტრთა კაბინეტის ის წევრები, რომლებიც მთავრობის იმიჯის დისკრედიტაციას ახდენენ.

გაზეთის ვერსიით ირაკლი ღარიბაშვილი თავის მთავარ კონკურენტს ირაკლი ალასანიაში ხედავს, დღევანდელი თავდაცვის მინისტრის წარსული და ამერიკული კავშირები არ აძლევს საშუალებას ღარიბაშვილს, ალასანია მთლად ოდიშარიასავით მოიცილოს თავიდან, მაგრამ სავარაუდოდ , იგი აუცილებლად შეეცდება, მეტოქე თავდასცვის სამინისტროს ჩამოაშოროს და შედარებით ნაკლებამბიციური სამინისტროს მართვა ჩააბაროს, მაგალითად, საგარეო საქმეთა სამინისტრო და მისი მინისტრის პორტფელი. თავისი დანიშნულებით ეს სამინისტრო ხელწამოსაკრავი არ არის და ცხადია საკვანძო რგოლს წარმოადგენს ქვეყნის ცხოვრებაში, მაგრამ მხოლოდ საგარეო პოლიტიკის კუთხით. როგორც წესი, საგარეო საქმეთა მინისტრებს საშინაო პოლიტიკაში შედარებით ნაკლებად ახედებენ და ნაკლები გავლენაც აქვთ.

„ქრონიკა+“ წერს, რომ მინისტრთა კაბინეტში ალასანიას მხარდამჭერი მინისტრებიდან-პაატა ზაქარეიშვილი, თეა წულუკიანი, ალექსი პეტრიაშვილი და მაია ფანჯიკიძე, საშემოდგომო ცვლილებები რამდენიმე მათგანს შეეხება, პირველ რიგში თეა წულუკიანს და მაია ფანჯიკიძეს.