ხურვალეთიდან ე.წ. რუსმა მესაზღვრეებმა საქართველოს ორი მოქალაქე გაიტაცეს. მამა-შვილი, ავთანდილ და შოთიკო აწკარუნაშვილები, რომლებიც სოფელ ახალსოფლის მკვიდრები არიან, ოკუპანტებმა იმ დროს გაიტაცეს, როცა ისინი ხურვალეთში თივის საყიდლად იყვნენ ჩასული. აწკარუნაშვილები სოფელში თივით ვაჭრობდნენ. ,,ნიუპოსტის" ინფორმაციით, მათ საოკუპაციო საზღვარი არ გადაუკვეთიათ, პირიქით, რუსი ოკუპანტები გადმოვიდნენ საზღვარს და მამა-შვილი სატვირთო მანქანიანად გაიტაცეს.

აღნიშნული ინფორმაცია ,,ნიუპოსტს“ სოფლის რწმუნებულმა ზაზა მურზაშვილმა დაუდასტურა. შემთხვევა გუშინ მოხდა. ადგილობრივები ამბობენ, რომ ოკუპანტები რამდენიმე დღის განმავლობაში იმ ტერიტორიას ზვერავდნენ, სადაც ქერის აღების სამუშაოებს აწარმოებენ. ოჯახს არ აქვს ინფორმაცია, ამ დროისთვის სად იმყოფებიან გატაცებულები.

გიორგი ახალკაცი, გორი, ,,ნიუპოსტი“