რა მიზანს ემსახურებოდა რეალურად პუტინის ,,ჰუმანიტარული მისია“ უკრაიანში

პოლიტიკა - 14:12, 23 Aug, 2014

2110

როგორც ,,ნიუპოსტს“ დონეცკიდან წყარო ატყობინებს, რუსეთის ფედერაციის პრეზიდენტის ვლადიმერ პუტინის რეალური მიზანი შეიძლება ყოფილიყო რამდენიმე მიმართულებით: ერთი ეს არის პროვოკაცია ავტოკოლონის საზღვარზე გადაკვეთის შემთხვევაში, რომელიც მას ფართომასშტაბიანი ომის წარმოების საშუალებას მისცემდა, მაგრამ რეალური ძალები, რასაც რუსეთი ფლობს და ის საერთაშორისო მხარდაჭერა, რომელიც უკრაინამ მიიღო, პუტინს ამის საშუალებას არ აძლევს.

მეორე ეს იყო ტერორისტების მომარაგება იარაღით, რაც ალბათ ნაწილობრივ განახორციელა კიდეც, თუმცა ამას პუტინი ყოველთვის აკეთებდა. მაგრამ სულ უკანასკნელი ინფორმაცია, რომელიც აქ დონეცკსა და ლუგანსკში ვრცელდება, ალბათ მეტყველებს პუტინის ავტოკოლონის უკრაინაში არალეგალური შესვლის რეალურ მიზანზე.

სატვირთოებში, რომლებიც შემოვიდნენ რუსეთის ფედერაციიდან ლუგანსკში, მთელი აქ ყოფნის განმავლობაში იტვირთებოდა აღმოსავლეთ უკრაინის ტერიტორიაზე განლაგებული სტრატეგიული მნიშვნელობის ქარხნების დანადგარებით. ამის დასტურად შეიძლება ჩაითვალოს ლისენკოს მიერ სულ ახლახანს გაკეთებული განცხადება კიევში გამართულ პრესკონფერენციაზე: ,,ოპერატიული ინფორმაციის თანახმად, სატვირთო ავტომობილები, რომლებიც შემოვიდნენ უკრანაში ჰუმანიტარული დახმარების სარჩულით, რუსების მიერ იტვირთება დონეცკის ქარხანა ,,ტოპაზის“ და ლუგანსკის ერთ-ერთი ქარხნის დანადგარებით, ეს ქარხნები ახორციელებდნენ სამხედრო დანიშნულების წარმოებას“.

როგორც რუსული საინფორმაციო საშუალებები გადმოსცემენ, ამ კოლონის პირველი ნაწილი უკვე გაბრუნდა რუსეთის ტერიტორიაზე.