ფინანსთა მინისტრი ნოდარ ხადური აცხადებს, რომ დარიალის ხეობაში გზის გახსნის შემდეგ საბაჟო მუშაობას ჩვეულ რეჟიმში გააგრძელებს.

მინისტრის თქმით, ამ დროისთვის სასაზღვრო-გამშვებ პუნქტ "ყაზბეგზე" სტიქიის შედეგად მიყენებული ზარალი კონკრეტულად ცნობილი არ არის, თუმცა ზიანი მნიშვნელოვანია.

"ჯერჯერობით ზიანის კონკრეტულ მოცულობასა და რაოდენობაზე საუბარი ზედმეტია. სამწუხაროდ, ზიანი მნიშვნელოვანია. ლარსის სასაზღვრო გამშვები პუნქტის სამი ნაგებობიდან ორი ქვით და ლამითაა დაფარული. დაახლოებით ნახევარ მეტრამდე ნაშალი შეტანილია შენობაში და მისი გამოტანა აუცილებელია. დაზიანებულია ხელბარგების სკანერი, კომპიუტერული ტექნიკა, გათბობის და ელექტრომომარაგების სისტემა. სავარაუდოდ დაზიანებულია მანქანების სკანერი და სასწორი. საბოლოო ჯამში ეს საკმაოდ დიდ თანხებს უკავშირდება. თუმცა, მიუხედავად იმისა, ჩვენ მოვახერხებთ თუ არა სკანერის აღდგენას, გზის გახსნასთან ერთად საბაჟო გააგრძელებს ჩვეულებრივ რეჟიმში მუშაობას. ამ წუთებშიც კი ერთ-ერთი შენობის ქვეშ თერგის ნაწილი მიედინება“,- განაცხადა ნოდარ ხადურმა.

მისივე განცხადებით, ერთი შენობა სტიქიას სრულიად გადაურჩა.

„ეს არის გამსვლელი დარბაზი. იქ არ შესულა წყალი. მიმღები დარბაზი და ტრანსპორტის შემოსავლელი გეიტები არის დაზიანებული და ერთ-ერთი შენობის დანგრევის საფრთხე არის. თუმცა იმედი გვაქვს გადავარჩენთ", - აღნიშნა ხადურმა.

ნინა შადური