გეგუთის სასჯელაღსრულებით დაწესებულებაში პატიმარ გიგა ფარტენაძის გარდაცვლების შემდეგ ექვსი თვე გავიდა, აღნიშნულთან დაკავშირებით გარდაცვლილის ძმამ კობა ფარტენაძემ „პირველის პრესკლუბში“ პრესკონფერენცია გამართა და მისი ძმის გარდაცვალებაში მონაწილე ყველა პირის დასჯა მოითხოვა:

“უკვე 6 თვე გავიდა, რაც ჩემი ძმის გარდაცვალების საქმეზე გამოძიება მიმდინარეობს, მაგრამ წინ არ წასულა. არ არის დაკითხული საქმის არცერთი მოწმე. პროკურორების მიერ საქმის გადაფარვა ხდება. მიუხედავად იმისა, რომ საქმეს 3 პროკურორი ჰყავს, ისინი დაზარალებულის ოჯახთან არ თანამშრომლობენ. ოჯახი მოვითხოვთ უშუალოდ სასჯელაღსრულების დეპარტამენტის მაშინდელი უფროსის დიმიტრი დარბაისელის დაკითხვას, რომელმაც მოაწერა ხელი განკარგულებას, რომლის თანახმადაც, ჩემს ძმასთან საკანში გადაიყვანეს 3 ფსიქიურად აშლილი ადამიანი, რომლებიც რუსთავის ციხეში განცალკავებულად იყვნენ და პატიმრებისთვის საშიშროებას წარმოადგენდნენ. ეს პატიმრები დიმიტრი დარბაისელისა და ჯაბა მაღლაფერიძის ხელმოწერით უკანონო გეგუთის ციხეში იყვნენ გადაყვანილები. მათი გადაყვანიდან 3 Dდღის შემდეგ ჩემი ძმა გარდაიცვალა და ბადრაგმა არაფერი გააკეთა იმისთვის, რომ მისი სიცოცხლე გადაერჩინა, ასე რომ, აქ ბადრაგის დანაშაულებრივი კვალი იკვეთება, თუმცა მასზე არათუ საქმე არაა აღძრული, არამედ დაკითხულიც კი არ არის.

ასევე არ გვიბრუნებენ ჩემი ძმის ტანსაცმელს, რომელიც ექსპერტიზაზე არ არის წაღებული. უფრო მეტიც, პროკურორმა განგვიცხადა, რაში გჭირდებათო. ჩემი ძმისაა და მჭირდება, რადგან ერთადერთი მისგან ეს დამრჩა. ვთხოვ, მათ რომ ჩემი ძმის ტანსაცმელი დამიბრუნონ და საქმე ობიექტურად გამოიძიონ”, - განაცხადა კობა ფარტენაძემ.