ანექსიის გაფორმება - აფხაზეთში კრემლთან ასოცირებულ ხელშეკრულებაზე საუბრობენ

პოლიტიკა - 20:45, 21 Aug, 2014

1641

24 აგვისტოს ოკუპრებულ აფხაზეთში არაღიარებული საპრეზიდენტო არჩევნებისთვის ემზადებიან. არჩევანი 4 კანდიდატს შორის უნდა გაკეთდეს, სავარაუდოდ მოიგებს ის, ვინც უფრო მეტად პრორუსული იქნება. დეფაქტო პირველობისთვის იბრძვიან: რაულ ხაჯიმბა, ასლან ბჟანია, მერაბ ქიშმარია და ლეონიდ ძიაპშპა. ოთხივე მათგანისთვის აფხაზეთის მომავალი რუსეთის გარეშე წარმოუდგენელია. აფხაზეთში კრემლთან ასოცირებულ ხელშეკრულებაზეც საუბრობენ, რასაც ექსპერტები ანექსიის გაფორმებად აფასებენ.

გალის ქართულ მოსახლეობას ქართული პასპოპრტების გამო ხმის მიცემა აეკრძალათ.

პაატა ზაქარეიშვილი მიიჩნევს, რომ აფხაზეთის კიდევ უფრო დაახლოება რუსეთთან მოსალოდნელი არ არის. ,,თამამად შემიძლია გითხრათ ხელისუფლების სახელით, რომ ვინც არ უნდა იყოს დეფაქტო მმართველი აფხაზეთში, ჩვენ მზად ვართ ყველასთან ვითანამშრომლოთ. საკმარისად ინტეგრირებული დღევანდელი როგორც დეფაქტო ხელისუფლება ისე აფხაზეთის რეალობა რუსეთში. მაგრამ უკრაინის და განსაკუთრებით ყირიმის მოვლენებიდან გამომდინარე, ვისაც კი რამე უკეთესი წარმოდგენა ჰქონდა რუსეთზე, ისინიც კი გამოფხიზლდნენ და ამიტომ, ცალსახა არ არის პრორუსული განწყობები ზოგადად აფხაზეთში, მაგრამ პრობელმა ისაა, რომ სხვა არანაირი პრო-განწყობებიც არ არის“, - აცხადებს მინისტრი.

ელენე ხოშტარია მიიჩნევს, რომ დეფაქტო არჩევნებში სამჯერ დამარცხებული რაულ ხაჯიმბასთვის ვარსკვლავური საათი დადგა. ექსპერტისთვის განსაკუთრებით საგანგაშოა ანექსიის ახალი ფორმა, რომელსაც კანდიდატებმა ასოცირება დაარქვეს.

,,მთავარი თემა, რაც თან სდევს ანქვაბის იქიდან გაგდებას და მთელ ამ კრიზისს, რაც მოხდა მაისში, ეს არის რუსეთთან აფხაზეთის ე.წ. ასოცირების პროცესი. თუ წავიკითხავთ რა მოსაზრებები ტრიალებს იგივე აფხაზეთის ოფიციალური პირებისგან ან დისკუსიებში, რა ტიპის ასოცირება უნდა იყოს ეს, შინაარსობრივად ეს არის ანექსიის ტოლფასი. აქ არის საუბარი ეკონომიკური, უსაფრთხო, სასაზღვრო სისტემების შერწყმაზე საუბარი. პრაქტიკულად ეს არის აფხაზეთის ჩაყლაპვა“, - აცხადებს ექსპერტი.