საქართველო და სომხეთი “მეგობრობის ხიდს” ააშენებენ

პოლიტიკა - 17:08, 21 Aug, 2014

1747

საქართველოს პრემიერ-მინისტრმა ირაკლი ღარიბაშვილმა სომხეთში ვიზიტის შემაჯამებელ პრესკონფერენციაზე სომეხ კოლეგას თბილი მასპინძლობისთვის მადლობა გადაუხადა.

ირაკლი ღარიბაშვილმა კმაყოფილება გამოთქვა იმის გამო, რომ მიეცა საშუალება, მოენახულებინა ქვეყანა, რომელთანაც საქართველოს მჭიდრო ურთიერთობა აკავშირებს.

“ჩვენ შევთანხმდით, რომ კიდევ უფრო გავაღრმაოთ საქართველოსა და სომხეთს შორის არსებული მჭიდრო თანამშრომლობა და მეგობრობა. ეს ვიზიტი სწორედ ამ მიზანს ემსახურება. ჩვენ მიმდინარე წლის 6 თვის განმავლობაში სავაჭრო ბრუნვა გავზარდეთ 42%-ით, ხოლო გასულ წელს - 50%-ით. ეს ყველაფერი მეტყველებს იმაზე, რომ ჩვენს ქვეყნებს შორის არსებული სავაჭრო-ეკონომიკური, მეგობრული ურთიერთობები სულ უფრო და უფრო ვითარდება და ჩვენ ამას გავაგრძელებთ”, - განაცხადა პრემიერ-მინისტრმა.

მისივე განცხადებით, გარდა უმაღლესი თანამდებობის პირების შეხვედრებისა, კარგი იქნებოდა, თუ ურთიერთობები დარგობრივ დონეზეც დამყარდება.

როგორც პრემიერმა აღნიშნა, კოლეგასთან შეხვედრაზე საუბარი შეეხო რეგიონში მშვიდობისა და უსაფრთხოების უზრუნველყოფას, ასევე, განხილული იყო თანამშრომლობის საკითხთა ფართო სპექტრი.

“მინდა აღვნიშნო, რომ მივაღწიეთ შეთანხმებას, რომ სომხეთი და საქართველო ერთობლივად ააშენებენ ხიდს. დღეს მოვისმინე, რომ არსებობს ძალიან საინტერესო ინიციატივა, რომ ამ ხიდს “მეგობრობის ხიდი” ეწოდოს. ამ შემოთავაზებას, რა თქმა უნდა, სიამოვნებით დავთანხმდით”, - განაცხადა ირაკლი ღარიბაშვილმა.

მისივე თქმით, საუბარი დარიალის ხეობაში ჩამოწოლილ მეწყერსაც შეეხო და ქართულმა მხარეს დაზიანებული გაზის მილის ორ დღეში აღდგენის მზადყოფნა გამოთქვა, რათა სომხეთისთვის გაზის მიწოდება შეუფერხებლად გაგრძელდეს.

ნინა შადური