24 აგვისტოს რაჭაში ღვინის ფესტივალი გაიმართება

პოლიტიკა - 13:33, 21 Aug, 2014

3681

საქართველოს ტრადიციული მეღვინეობის გაერთიანების ორგანიზებით 24 აგვისტოს, 16:00 საათზე, რაჭაში, ქალაქ ამბროლაურში, ტურიზმის საინფორმაციო ცენტრის მიმდებარე სკვერში, გაიმართება რაჭა-ლეჩხუმის ღვინის ფესტივალი.

ფესტივალზე ადგილობრივი მეღევინეები საკუთარ მარნებში ტრადიციული მეთოდით დაყენებულ ღვინოებს წარმოადგენენ. სტუმრებს საშუალება ექნებათ დააგემოვნონ და შეაფასონ რაჭა-ლეჩხუმის შესანიშნავი, ექსკლუზიური ღვინოები.

ასევე მოეწყობა ხელნაკეთი ნივთების, ადგილობრივი უნიკალური ყველისა და თაფლის დეგუსტაცია.

ფესტივალის ფარგლებში გაიმართება კონცერტი, რომელშიც მონაწილეობას მიიღებენ ფოლკლორული ანსამბლები და ჯაზ ბენდი კანუდოსი.

რაჭა-ლეჩხუმის ღვინის ფესტივალი უკვე მეორე წელია ტარდება „საქართველოს ტრადიციული მეღვინეობის გაერთიანების“ ორგანიზებით.

ფესტივალი მიზნად ისახავს რეგიონში ტრადიციული მეღვინეობის აღდგენა შენარჩუნებას, მცირე მწარმოებელთა ხელშეწყობას, ადგილობრივი ღვინის პოპულარიზაციას, საოჯახო მეურეობის კულტურის განვითარებასა და ტრადიციული ვაზის ჯიშების მოძიება-შენარჩუნებას.

ფესტივალზე მოწვეულია დიპლომატიური კორპუსის, საერთაშორისო ორგანიზაციების, ტურისტული კომპანიების წარმომადგენლები;

ინფორმაცია ორგანიზაციის შესახებ:

საქართველოს ტრადიციული მეღვინეობის გაერთიანება 1 წლის წინ შეიქმნა და აერთიანებს: ქართლის, კახეთის, იმერეთის, რაჭისა და ლეჩხუმის, სამცხე ჯავახეთისა და სამეგრელოს მეღვინეობის ასოციაციებს.

ორგანიზაციამ 1 წლის განმავლობაში მოახდინა 250 ზე მეტი ღვინის დეგუსტაცია და მათ შორის საუკეთესო ექსკლუზიური 11 ღვინის ჩამოსხმა მოახდინა, ასევე ორგანიზაციის წევრებისათვის მთელი წლის განმავლობაში ტარდებოდა ტრენინგ-სემინარები მთელი საქართველოს მაშტაბით. ორგანიზაცია ეხმარება მეღვინეებს კონსულტაციაში, ღვინის დაწურვისათვის უსასყიდლოდ გადასცემს სხვადასხვა მოწყობილობებს, ახდენს მუდმივად ვენახის მოვლიდან დაწყებული ღვინის დაყენების ჩათვლის დაკვირვებას და კონსულტაციებს. ორგანიზაციის წევრთა რაოდენობამ 1 წლის განმავლობაში 700 მეღვინეს გადააჭარბა .

ფესტივალი ორგანიზაციის ტრადიციული ღონისძიებაა, რომელიც საშუალებას აძლევს მეღვინეებს დაუკავშირდნენ პოტენციურ მყიდველებს, ასევე შეფასდეს 1 წლის საქმიანობა და კვალიფიციური ექსპერტების მიერ მოხდეს ღვინის ხარისხის შემოწმება.