ბატონო პრეზიდენტო, ფილარეტის, კიევის საპატრიარქოს სახელით... გახსენით სიცოცხლის დერეფანი...!

სოც.მედია - 15:04, 20 Aug, 2014

2198

,,კიევის საპატრიარქოს უკრაინის მართლმადიდებლური ეკლესიის როვნოსა და ოსტროგის არქიეპისკოპოსი ილარიონი გამოეხმაურა საქართველოს პრეზიდენტისადმი ჩემს მიმართვას. მეუფე რამოდენიმე დღის წინ მსტუმრობდა თბილისში, სახლში. სწორად მაშინ, ჩვენი საუბრისას დავრწმუნდი: მიუხედავად იმისა, რომ ქართველი ხალხის ერთიან, უპირობო მხარდაჭერაში უკრაინაში ეჭვი არავის ეპარება, ამჟამად მათთვის უდიდესი მნიშვნელობა აქვს სახელმწიფო დონეზე პრაქტიკულ დახმარებას ნებისმიერი მიმართულებით, განსაკუთრებით კი ომის ზონიდან დევნილი მოსახლეობის, უპირველეს ყოვლისა, ბავშვების შეფარების საკითხში. ფილარეტის უზადო პატრიოტიზმისა და ავტორიტეტის წყალობით ავტოკეფალიისთვის მებრძოლი უკრაინული მართლმადიდებლური ეკლესიის მრევლს უკვე 16 მილიონი ადამიანი წარმოადგენს, პრომოსკოვურისა - 8 მილიონი და მრევლის თვითგამორკვევის პროცესი გრძელდება. უდავოა, რომ დამოუკიდებელ, ევროპულ უკრაინაში მომავალი სწორად ფილარეტისაა. ომში ჩართულ მებრძოლთა ამუნიციის ( არა შეიარაღების) და საკვების 80 პროცენტი კიევის საპატრიარქოს სახსრებითა და მრევლის მიერ შეგროვებული თანხებით არის შეძენილი. მაგრამ, მათი შესაძლებლობებიც არაა ამოუწურავი. ამიტომაც, საქართველოს დახმარება მათთვის ძალზედ ძვირფასი იქნება. ბატონო პრეზიდენტო, ჩემი მიმართვის შემდეგ, მხოლოდ ერთი დღეღამის განმავლობაში მივიღე უამრავი წინადადება უბრალო მოქალაქეთაგან, საკუთარ სახლებში უკრაინელი ბავშვების შეფარებისთვის მზადყოფნასთან დაკავშირებით. მაგრამ, პროცესის განვითარება სახელმწიფოს მხრიდან დახმარების გარეშე მას რთულსა და არაეფექტურს გახდის, კეთილ სურვილს სურვილადვე დატოვებს. ომი აღმოსავლეთ უკრაინაში სულ უფრო სიახლისმღვრელი ხდება. მსხვერპლი ყოველსაათობრივად იზრდება. თქვენ ერთი სწრაფი გადაწყვეტილებით უამრავი პატარას სიცოცხლის გადარჩენა შეგიძლიათ. ქართველი და უკრაინელი ადამიანების სახელით, მეუფე ილარიონის, ფილარეტის, კიევის საპატრიარქოს სახელით, ბოლოსდაბოლოს, ელემენტალური კაცთმოყვარეობის სახელით გთხოვთ, ნუ ყოყმანობთ, მიიღეთ გადაწყვეტილება და გახსენით სიცოცხლის დერეფანი უკრაინელი ბავშვებისთვის!“, - წერს გივი თარგამაძე.