გიორგი ვაშაძე მისი ძმის წინააღმდეგ წამოებულ ცილისმწამებლურ კამპანიას ეხმაურება

პოლიტიკა - 19:21, 19 Aug, 2014

5286

საპარლამენტო უმცირესობის წევრი გიორგი ვაშაძე მისი ძმის წინააღმდეგ წარმოებულ ცილისმწამებლურ კამპანიას ,,ფეისბუქის“ გვერდზე ეხმაურება. ვაშაძე ბოდიშს უხდის ოჯახს და ყველა მის ახლობელს, რომელსაც მისი პოლიტიკური აქტიურობის გამო ,,უწევთ თმენა ამგვარ უხამსობაზე“.

,,მინდა გამოვეხმაურო ჩემი ძმის წინააღმდეგ მიმართულ ცილისმწამებლურ კამპანიას, რომელიც მიზნად ისახავს მის შეურაცყოფას, მხოლოდ იმიტომ რომ ჩემი ძმაა.

მინდა ბოდიში მოვუხადო ჩემს ძმას, ჩემი ოჯახის წევრებს, ყველა ჩვენს საერთო მეგობარსა და ნაცნობს, რომლებსაც უწევთ ჩემი პოლიტიკური აქტიურობის გამო თმენა ამგვარი უხამსობების.

პოლიტიკოსს აქვს თმენის ვალდებულება, ეს არის მისი პროფესიის ნაწილი და მე ეს ცხადად მაქვს გააზრებული. თუმც, პოლიტიკური კულტურა გულისხმობს გარკვეული ზღვრების დაცვას. ძალიან სამწუხაროა, რომ ჩვენი საზოგადოების ნაწილი ვერ გაიზარდა და ამის გააზრება უჭირს.

ამასთან, მადლობა მინდა გადავუხადო იმ უამრავ ნაცნობს თუ უცნობს, რომლებმაც ამ მომენტში ღირსეული პოზიცია დაიკავა და თავისი პოზიცია დააფიქსირა, როგორც საჯაროდ, ასე პირად კომუნიკაციაში.

დანარჩენს ამ საკითხის სამართლებრივი შეფასება და განსჯა გვიჩვენებს.

და ბოლოს მინდა ხაზი გავუსვა, რომ მსგავსი უხამსობა ნამდვილად ვერ შეაჩერებს ბრძოლას ქვეყნის უკეთესი მომავლისთვის!“, - წერსი გიორგი ვაშაძე.