საქართველოს პრეზიდენტმა გიორგი მარგველაშვილმა საკანონმდებლო ორგანოს წარმომადგენლებს, დიპლომატიური კორპუსის წევრებს და ექსპერტებს ეროვნული უშიშროების საბჭოს შესახებ მისეული ხედვა გააცნო.

შეხვედრის დასრულების შემდეგ კომენტარი გააკეთა უშიშროების საბჭოს მდივანმა ირინა იმერლიშვილმა.

„როდესაც საკითხი ადის პრეზიდენტამდე, მისი ჩართულობა არის აუცილებელი, იმიტომ, რომ ეს გადაწყვეტილება არის სტრატეგიული, ან უმაღლესი პოლიტიკური გადაწყვეტილება, მხოლოდ ამ შემთხვევაში იკრიბება ეროვნული უშიშროების საბჭო და ურჩევს პრეზიდენტს მიიღოს თუ არა ესა თუ ის გადაწყვეტილება, ასეთია მაგალითად, საომარი მდგომარეობის გამოცხადება, საგანგებო მდგომარეობის გამოცხადება, მაგალითად თვითმმართველობის დათხოვნა, პირდაპირი მმართველობის შემოღება და ა.შ.“,- განაცხადა ირინა იმერლიშვილმა.

საქართველოს პრეზიდენტი გიორგი მარგველაშვილი უშიშროების საბჭოს მუდმივმოქმედ წევრთა შემადგენლობის გაფართოების ინიციატივით გამოდის, პრეზიდენტი მიიჩნევს, რომ საბჭოში სამი სახელისუფლო ინსტიტუტის - პრეზიდენტის, მთავრობისა და პარლამენტის - წარმომადგენლობა უნდა შევიდეს.