საპატიო კონსულები საგარეო საქმეთა სამინისტროს ბრალდებებს უყენებენ. დიპლომატები მაია ფანჯიკიძის უწყებას მათი უფლებების უხეშად ხელყოფასა და საერთაშორისო კონვენციების დარღვევაში ადანაშაულებენ.

ცნობილი ხდება, რომ 14 აგვისტოს საპატიო კონსულებმა ირაკლი ღარიბაშვილს და პარლამენტის თავმჯდომარეს წერილით მიმართეს და საკითხის შესწავლა უფლებათაშორისი კომისიის ფარგლებში მოითხოვეს. მიმართვას ხელს 22 საპატიო კონსულიდან 17 აწერს ხელს.

მათი განცხადებით მიმდინარე წლის პირველი სექტემბრიდან ძალაში შედის საპატიო კონსულებისთვის დაწესებული შეზღუდვები, რაც პროტესტის მიზეზი გახდა. დიპლომატიური მისიებისთვის პროტოკოლის სახელმძღვანელოში ცვლილებების რამდენიმე მუხლია, მათ შორის არის სპეცნომრების ჩამორთმევა, აეროპორტებში პარკირების უფლებების გაუქმება.

„ამ ტიპის შეზღუდვების იმპლემენტაცია ცალსახად გააუარესებს დიპკორპუსის სამუშაო პირობებს და ბუნებრივია ნეგატიურად იმოქმედებს იმ საქმიანობაზე, რომელსაც ეწევიან ჩვენი კოლეგები“, - ნათქვამია წერილში.

საქართველოს საგარეო საქმეთა მინისტრმა უკვე გააკეთა განცხადება, მაია ფანჯიკიძე ამბობს, რომ საპატიო კონსულების რეაქციით გაკვირვებულია.

„საპატიო კონსულების იმუნიტეტი, ყველანაირი პრივილეგია და ყველანაირი შეღავათი გავრცელდება მაშინ, როდესაც ისინი შეასრულებენ საპატიო კონსულის მოვალეობას და არანაირი შეზღუდვა მათ ამის გამო არ ექნებათ თავიანთი საქმის შესრულებისას. ამიტომ, ჩემთვის სრულიად გაუგებარია რატომ გამოთქვეს მათ პრეტენზია ამ ფაქტის მიმართ და დარწმუნებული ვარ, როდესაც ყურადღებით წაიკითხავენ კიდევ ერთხელ იმ ახალ წესებს, რომელიც შემოგვაქვს, დაეთანხმებიან მათ“, - განაცხადა მაია ფანჯიკიძემ.