საქართველოს პრეზიდენტმა უშიშროების საბჭოს ახალი კონცეფცია წარადგინა. საკუთარი ხედვა გიორგი მარგველაშვილმა დეპუტატებს, არასამთავრობოებს, კონსტიტუციონალისტებს და დიპლომატებს გააცნო. გიორგი მარგველაშვილი ფიქრობს, რომ შესაძლოა უშიშროების საბჭოს წევრთა რაოდენობა გაიზარდოს.

„ამ შეხვედრისას კონფრონტაციული თემების განხილვა არ ყოფილა, ჩვენ დავესწარით საინტერესო დისკუსიას, რომელიც საქართველოს ეროვნული უსაფრთხოების, კრიზისების და მათზე რეაგირების მექანიზმების შემუშავებას ეხება. ამ დისკუსიაში შეერთებულ შტატებს თავისი წვლილი შეაქვს, ამერიკის განვითარების სააგენტოს მიერ დაფინანსდა საქართველოს ატლანტიკური საბჭო, რომლის მიერ წარმოდგენილია საინტერესო ანგარიში.

ეს გახდა საინტერესო დისკუსიის ნაწილი, რომელიც ეხება იმას, თუ როგორი სისტემა უნდა მუშაობდეს საქართველოში კრიზისების დროს, უნდა გვახსოვდეს ისიც, რომ ეს არ არის მხოლოდ თეორია, ვინაიდან კრიზისი ნებისმიერ დროსაა მოსალოდნელი და თუ კარგად განსაზღვრული სისტემა და მექანიზმები არ იქნება, შესაძლოა ამან აღრევაც გამოიწვიოს. მნიშვნელოვანია ისიც, რომ მთავრობის ყველა წევრმა იცოდეს საკუთარი ფუნქციების, პასუხისმგებლობისა და რეაგირების საჭიროების შესახებ“, - განაცხადა რიჩარდ ნორლანდმა.