საქართველოს პრეზიდენტმა ქვეყნის ეროვნული უშიშროების საბჭოს ფუნქციონირებაზე განმარტება გააკეთა. გიორგი მარგველაშვილმა ამის შესახებ რამდენიმე წუთის წინ გამართულ ბრიფინგზე ისაუბრა:

„დღეს ჩვენ გვქონდა მნიშვნელოვანი სიღრმისეული აზრთა გაცვლა, თუ როგორ უნდა იფუნქციონიროს არსებული საკონსტიტუციო ცვლილებების ფონზე ქვეყნის ერთერთმა მნიშვნელოვანმა ორგანომ, ეროვნული უშიშროების საბჭომ, ჩვენ კიდევ ერთხელ ხაზი გავუსვით იმას, რომ ეს ორგანო საქართველოს კონსტიტუციური მოწყობის ერთერთი მნიშვნელოვანი შემადგენელი ნაწილია, მისი ეფექტური ფუნქციონირება უზრუნველყოფს უმნიშვნელოვანეს გადაწყვეტილებებს, ასეთ გადაწყვეტილებებს სჭირდება სიღრმისეული გააზრება, ეს მოხდება ორგანოში, რომლის ფუნქციაც გაწერილია კონსტიტუციით, ეს არის უშიშრიების საბჭო. ამ ორგანოში მნიშვნელოვნად წარმოდგენილი უნდა იყოს პარლამენტი.

გვქონდა დეტალური და ღრმა დისკუსია, იყო შეხედულებები, შენიშვნები, დამატებითი დეტალები, რომელიც დამუშავდება, იმიტომ, რომ ეს პროექტი მკაფიოდ იქნება განხილული პარლამენტში.

ჩვენი ქვეყნის ეფექტური მუშაობისთვის ძალიან მნიშვნელოვანია, რომ კონსტიტუციური ორგანო ეფექტურად მუშაობდეს და ეს იყოს ადგილი, სადაც ერთმანეთს ეთათბირებიან მნიშვნელოვან საკითხებზე, როგორც პარლამენტის ასევე აღმასრულებელი ხელისუფლების წარმომადგენლები. ჩვენი თანამშრომლობა გაგარძელდება, გავივლით დეტალურად იმ საკითხებს, რაც ამ შეხვედრაზე იქნა წამოჭრილი, ეს არის ის ფორმატი, რაზეც შევთანხმდით“, - განაცხადა გიორგი მარგველაშვილმა.