საქართველოს ჯანდაცვის მინისტრის დავით სერგეენკოს განცხადებით, სამედიცინო სასწავლებლის დასრულების შემდეგ, სტუდენტს თუ სწავლის გაგრძელებისთვის სახსრები არ ექნება, მას ჯანდაცვის სამინისტრო გარკვეული პირობების სანაცვლოდ დაეხმარება. ამის შესახებ სერგეენკომ „კვირის პალიტრასთან“ საუბრისას განაცხადა:

„სექტემბრიდან დაიწყება ახალი პროექტი "პოსტდიპლომური განათლების დაფინანსება". ვთქვათ, სტუდენტმა დაამთავრა სამედიცინო სასწავლებელი და დიპლომის შემდგომი განათლება აქვს მისაღები, მაგრამ ფული არა აქვს. ამ შემთხვევაში სახელმწიფო გადაუხდის, ოღონდ იმ პირობით, რომ სამი წლით რაიონში წავა სამუშაოდ.

ჯანდაცვის სამინისტრო მთელი საქართველოს მასშტაბით დააფინანსებს დეფიციტურ საექიმო სპეციალობებს.

რეგიონებში არ ჰყავთ ანესთეზიოლოგ-რეანიმატოლოგი, ქირურგი, მეან-გინეკოლოგი. მაგალითად, რაიონში არის სამშობიარო განყოფილება, მაგრამ სისხლდენით რომ მივიდეს ქალი, ვერაფერს გაუკეთებენ, ვერ დაეხმარებიან, რადგან ანესთეზიოლოგი არა ჰყავთ. ჩვენ გამოვიკვლიეთ, რომელ რაიონში რა სპეციალობა უჭირთ და სელექციურად მოვუმზადებთ სპეციალისტებს.“, - აცხადებს სერგეენკო.