საქართველოს ყოფილი პრეზიდენტის მიხეილ სააკაშვილის ადვოკატი ოთარ კახიძე პროკურატურის მიერ გასაჯაროვებულ დოკუმენტებთან დაკავშირებით კომენტარს აკეთებს.

კახიძის განცხადებით, პროკურატურა სანამ დოკუმენტებს გააყალბებდა, მანამდე უნდა გაერკვია თუ რამდენი ბოტოქსის პროცედურის ჩატარებაა წელიწადში შესაძლებელი.

„ბოტოქსის პროცედურა, მთავარი პროკურატურის გასაგონად მსურს ვთქვა, ღირს 250-300 ევრო დაახლოებით და წელიწადში ორ-სამ პროცედურაზე მეტის ჩატარება არ შეიძლება. თუ ამას გავამრავლებთ 5 წელიწადზე 2009-2013 წლებზე, გამოდის, რომ სულ 4000 ევროს ღირებულების ბოტოქსი შეიძლება გაიკეთოს ადამიანმა. რანაირად გამოდის 400 ათასი ლარის დახარჯვა?

სანამ ამ დოკუმენტს გააყალბებენ, მანამდე უნდა ნახონ რამდენი ბოტოქსი შეიძლება გაიკეთოს ადამიანმა.

პრეზიდენტს ბუნებრივია უნდა ჩაეტარებინა სამკურნალო პროცედურები, რომელიც მას აწუხებდა, კანის, სხვადასხვა ტიპის პრობლემები, ეს არავითარ კავშირში არ არის ბოტოქსთან, პროკურატურის „ასავალდასავალიზაცია“ კი ამასთან არის კავშირში“ - განაცხადა ოთარ კახიძემ.