მოდერნიზებული სახელმწიფო სერვისების საპილოტე ოფისის გახსნა კიევში

პოლიტიკა - 18:47, 16 Aug, 2014

1573

15 აგვისტოს, უკრაინის იუსტიციის მინისტრმა პაველ პეტრენკომ, უკრაინის სახელმწიფო სარეგისტრაციო სამსახურის ხელმძღვანელთან ანა ონიშენკოსთან და ქართველი ექსპერტების ჯგუფთან ერთად, კიევში ოფიციალურად გახსნა სახელმწიფო სერვისების საპილოტე ოფისი.

საპილოტე ოფისი უკრაინაში მიმდინარე სახელმწიფო სერვისების რეფორმის პროექტის ნაწილია. „ოპერატიული ოფისის” ამოცანას წარმოადგენს, ქართველი ექსპერტების ჯგუფის მიერ ოტპიმიზირებული პროცედურების დანერგვა და ამგვარად მოქალაქეებისთვის სერვისის გამარტივება. ასევე, პილოტირების პროცესში გამოვლენილი ხარვეზების აღმოჩენა და გამოსწორება, შემდგომში სერვისის მთელი ქვეყნის ტერიტორიაზე მასშტაბირება.

პროექტის ფარგლებში მომზადდა მობილური სამუშაო ჯგუფი, რომელმაც გაიარა სპეციალური ტრენინგი ოპერატიული და კომფორტული სერვისის უზრუნველსაყოფად. ოპტიმიზირებული პროცედურების შედეგად მომსახურების დრო მინიმუმამდეა დაყვანილი, აღარ არის რიგების პრობლემა, ფაქტიურად აღარ არსებობს შეჩერებული საქმეები, მომსახურება ორიენტირებულია ყველა მოქალაქის განაცხადის დაკმაყოფილებაზე.

„შემოდგომიდან ამ ახალ მოდელს რეგიონულ ცენტრებსა და ქალაქებში დავნერგავთ. წლის ბოლოსთვის კი, ტექნიკური შესაძლებლობების გათვალისწინებით, ამ სისტემას ადმინსტრაციული სერვისების ცენტრებშიც ავამოქმედებთ“ - განაცხადა უკრაინის იუსტიციის მინისტრმა პაველ პეტრენკომ.

ქართველი ექსპერტების ჯგუფი გიორგი ვაშაძის, ჯაბა ებანოიძისა და ლევან ვარშალომიძის ხელმძღვანელობით, რამდენიმე თვეა კონსულტირებას უწევს უკრაინის მხარეს, უკრაინის იუსტიციის სამინისტროს, სახელმწიფო სერვისების რეფორმის მიმართულებით. მიმდინარეობს აქტიური მუშაობა საიდენტიფიკაციო დოკუმენტების, სამოქალაქო აქტების (დაბადების/ქორწინების მოწმობა), ქონებისა და ბიზნესის რეგისტრაციის, სახელმწიფო შესყიდვებისა და საბაჟო სერვისების მიმართულებით.