ექსპერტი გია ხუხაშვილი კანცელარიის უფროსის ნინო კობახიძის მიერ გაკეთებულ განცხადებას ეხმაურება, რომელიც პრემიერისა და პრეზიდენტის კითხვა-პასუხს უკავშირდება:

„ირონიის მომგვრელია ადმინისტრაციის უფროსის მოადგილის ამ პოლემიკაში შესვლა, იმიტომ, რომ პრეზიდენტი იქ საუბრობს კიდეც, კანონი, სუბორდინაცია მიუთითებს და ამის საპასუხოდ საკმაოდ დაბალი რანგის ჩინოვნიკი ამ სუბორდინაციას კიდევ ერთხელ არღვევს. საერთოდ გაუგებარია, ეს ადამიანი საიდან გაჩნდა და რატომ აძლევს საკუთარ თავს ამდენის უფლებას. მას არც კომპეტენცია და არც დამსახურება საზოგადოების წინაშე არ აქვს, რომ ამდენი ილაპარაკოს“, - განაცხადა გია ხუხაშვულმა.

ნინო კობახიძის განმარტებით პრეზიდენტის გადაწყვტილება იმის გამო დაგვიანდა, რომ საკითხი სენსიტიური იყო.

„არ მიიჩნევდა მართებულად გრიფის მოხსნას, მითუმეტეს, რომ გაგზავნილი იყო წერილი და დასკვნა, რომლითაც იკვეთება, რომ თავის დროზე აღნიშნულ საკითხს გრიფი აბსოლუტურად უკანონოდ დაედო, ვფიქრობ, პრეზიდენტის მხრიდან კანონზე აპელირება და ხელისუფლებებს შორის ძალთა გადანაწილებაზე საუბარი ამ სიტუაციაში აბსოლუტურად უადგილოა“, - განაცხადა კობახიძემ.

ირაკლი ღარიბაშვილისთვის გაუგებარია რატომ დასჭირდა სახელმწიფო დაცვის სპეციალური სამსახურის ხარჯებზე გრიფი საიდუმლოს მოსახსნელად პრეზიდენტს ერთი თვე.

მარგველაშვილმა კი კითხვაზე საპასუხოდ განაცხადა, რომ მან გადაწყვეტილება მაშინ მიიღო, როდესაც სწორად მიიჩნია.