პრემიერი შეეცადა, ერთი გასროლით ორი პრეზიდენტი დაეზიანებინა

პრემიერი შეეცადა, ერთი გასროლით ორი პრეზიდენტი დაეზიანებინა - ხათუნა ლაგაზიძე

პოლიტიკა - 20:26, 15 Aug, 2014

2257

პრეზიდენტსა და პრემიერს შორის არსებულ დამოკიდებულებაზე ისაუბრა ექსპერტმა ხათუნა ლაგაზიძემ, რომელიც მიიჩნევს, რომ ეს პროცესი უარყოფითად აისახება ქვეყნის უსაფრთხოებასა და საერთაშორისო იმიჯზე.

,,მე ვფიქრობ, ამ განცხადებით, პრემიერი შეეცადა ერთი გასროლით ორი მიზანი დაეზიანებინა - ძველი და ახალი პრეზიდენტები. მაგრამ ეს არის ბრძოლა, რომელსაც სამწუხაროდ გამარჯვებული არ ჰყავს. ეს დაპირისპირება პრეზიდენტსა და პრემიერს შორის, რომელიც უკვე თვეებია გრძელდება, ანგრევს ქვეყნის უსაფრთხოების სისტემას და საფუძვლებს, ქვეყნის საერთაშორისო იმიჯს და სახელმწიფო ინსტიტუტებისადმი მოსახლეობის ნდობას“, - აცხადებს ხათუნა ლაგაზიძე.

პრემიერ-მინისტრისთვის გაუგებარია, თუ რატომ დასჭირდა პრეზიდენტს სდსს-ს ხარჯებთან დაკავშირებულ საქმეზე "გრიფით საიდუმლოს" მოხსნისთვის ერთი თვე. "სჯობია, პრეზიდენტ მარგველაშვილს ჰკითხოთ, რატომ დასჭირდა ერთი თვე გრიფი "საიდუმლოს" მოხსნას. თუმცა თითოეული მოქალაქისთვის კარგად იყო ცნობილი, რომ ხდებოდა ასეთი ხარჯების გაწევა. გირჩევთ, მიმართოთ პრეზიდენტს და ჰკითხოთ, რატომ დასჭირდა ამდენი დრო?", - განაცხადა ირაკლი ღარიბაშვილმა.

პრემიერის ამ განცხადებას მალევე უპასუხა პრეზიდენტმა მარგველაშვილმა. მისი თქმით, იმ საკითხებზე, რომელიც პრეზიდენტის კომპეტენციაში შედის, ვერავინ ვერ ეტყვის მას კანონით დაგგემილ ვადაში 5 წუთი იფიქროს, თუ - მეტი. „იმისთის, რომ დააჩქარო რაიმე გადაწყვეტილება, რაიმე ძალაუფლება უნდა გქონდეს. 9 წლის განმავლობაში სწორედ ეს არ მომწონდა წინა ხელისუფლების, რომ არ იცოდნენ სად მთავრდება კანონი, სად იწყება ვალდებულება და სად მთავრდება ხელისუფლებების გამიჯვნა. პრეზიდენტმა მაშინ გადაწყვიტა ეს საკითხი, როდესაც ეს სწორად მიიჩნია და ყურადღება უაღრესად ფაქიზად მიაქცია საკითხს, რომელიც არ არის მხოლოდ ჩვენი ქვეყნის შიდა პოლიტიკური საკითხი“, - განაცხადა მარგველაშვილმა.