საქართველოს პრეზიდენტის ინიციატივით გუშინ გიორგი მარგველაშვილსა და უკრაინის პრეზიდენტს შორის სატელეფონო საუბარი შედგეა. უკრაინული მხარის ცნობით, საქართველოს პრეზიდენტმა პოროშენკოს განუცხადა, რომ საქართველო მზად არის შეუერთდეს საერთაშორისო ჰუმანიტარულ მისიას უკრაინაში. ამის შესახებ ქართული მხარის მიერ გავრცელებულ განცხადებაში საუბარი არ ყოფილა. ინფორმაცია პოროშენკოს პრესსამსახურზე დაყრდნობით სააგენტო „უნიანმა“ გაავრცელა:

„ნიუპოსტთან“ საუბრისას პრეზიდენტის პრესსამსახურში გნმარტეს, რომ ქართული მხარის მიერ გავრცელებული განცხადების ბოლო წინადადებაში: „საუბრის დასასრულს, სახელმწიფოს მეთაურმა უკრაინელ კოლეგას თანადგომა აღუთქვა“ - ყოველგვარი მსგავსი დახმარება იგულისხმება:

„ჩვენ განცხადებაში, ბოლო წინადადებაში არის მითითებული, რომ საქართველოს პრეზიდენტმა თანადგომა და მხარდაჭერა აღუთქვა უკრაინის პრეზიდენტს, განცხადებაში რაც წერია, ჩვენ უფრო ფართო და ყოვლისმომცველი განცხადება გავავრცელეთ, სხვა თემებზეც იყო საუბარი, მე ინფორმაცია დეტალებზე არ მაქვს, მაგრამ რაც არის ჩვენს განცხადებაში ბოლო წინადადება, არის ზოგადად თანადგომაზე და დახმარებაზე“, - განაცხადა თიკო მჟავანაძემ „ნიუპოსტთან“ საუბრისას.

„გიორგი მარგველაშვილმა გამოხატა მზადყოფნა საქართველო შეუერთდეს საერთაშორისო ჰუმანიტარულ მისიას უკრაინაში, რადგან უახლოეს წარსულში საქართველოსაც ანალოგიური პრობლემა ჰქონდა“, - ნათქვამია პოროშენკოს პრესსამსახურის მიერ გავრცელებულ განცხადებაში.

გიორგი მარგველაშვილის პრესსამსახური კი შემდეგი შინაარსის ინფორმაციას აქვეყნებს:

„გიორგი მარგველაშვილმა პეტრო პოროშენკოსთან კიდევ ერთხელ გამოხატა მტკიცე მხარდაჭერა უკრაინის ტერიტორიული მთლიანობისა და სუვერენიტეტის მიმართ. საქართველოს პრეზიდენტის განცხადებით, იგი ყურადღებით აკვირდება უკრაინაში მიმდინარე პროცესებს. მისი თქმით, სამწუხაროდ, უკრაინას ახლა სწორედ ის პრობლემები აქვს, რომელთა წინაშეც საქართველო 2008 წელს იდგა და უკრაინაში განვითარებული მოვლენები 2008 წლის გაგრძელებაა. გიორგი მარგველაშვილმა ღრმა მწუხარება გამოხატა ადამიანური მსხვერპლისა და დევნილთა დიდი რაოდენობის გამო.

ორი ქვეყნის ლიდერებმა ორმხრივი ურთიერთობებიც განიხილეს და ხაზგასმით აღნიშნეს ქართველი და უკრაინელი ხალხის განსაკუთრებული მეგობრული დამოკიდებულება. საუბარი ასევე შეეხო რეგიონალური უსაფრთხოების გაძლიერების აუცილებლობის საკითხსაც. მათი განცხადებით, მნიშვნელოვანია, რომ ორი ქვეყანა კოორდინირებულად მოქმედებდეს საერთაშორისო არენაზე, მათ შორის, უელსის სამიტის ფარგლებში. ლიდერებმა ხაზგასმით აღნიშნეს, რომ ორი ერის დამოუკიდებელი და თავისუფალი არჩევანი დაცული უნდა იყოს. განსაკუთრებული ყურადღება მათ ევროკავშირთან ასოცირების ხელშეკრულების დროული იმპლემენტაციის საკითხს დაუთმეს.

საუბრის დასასრულს, სახელმწიფოს მეთაურმა უკრაინელ კოლეგას თანადგომა აღუთქვა“

ანო თორელი