საქართველოს პრემიერმინისტრის პრესსამსახურში ამერიკელი სენატორებისადმი გაგზავნილ პრემიერის წერილში არსებულ ტექნიკურ უზუსტობაზე კომენტარს აკეთებენ. საუბარია დავით კირვალიძის მაგალითზე, რომელიც ირაკლი ღარიბაშვილის წერილშია მოყვანილი:

„სამწუხაროდ გაიპარა ტექნიკური ხარვეზი, ეს არ იყო მიზანმიმართული. წერილის შინაარსის კონტექსტი გახლდათ აბსოლუტურად სხვა, ეს კონტექსტი გულისხმობდა რეალურ ფაქტს, რასაც ადგილი ჰქონდა, როდესაც აღიძრა თავის დროზე სისხლის სამართლის საქმე სამინისტროს რამდენიმე მაღალჩინოსნის მიმართ და სწორედ ამ ფაქტის გამო, სოფლის მეურნეობის ყოფილმა მინისტრმა აიღო პოლიტიკური პასუხისმგებლობა და საკუთარი ნებით გადადგა თანამდებობიდან“, - განაცხადა „ნიუპოსტთან“ საუბრისას მანანა თოქმაჯიშვილმა.

ამერიკელი სენატორებისადმი მიწერილ საპასუხო წერილში ირაკლი ღარიბაშვილი კანონის უზენაესობის აღსადგენად საქართველოს მთავრობის მიერ გადადგმულ ნაბიჯებზე საუბრობს და მაგალითად სოფლის მეურნეობის ყოფილი მინისტრის დავით კირვალიძის თანამდებობიდან გადადგომა მოჰყავს:

"ჩვენი მთავრობა ამის გამო აირჩიეს და, ჩვენი ყოველგვარი ჩარევის გარეშე, მთავრობისგან დამოუკიდებელ პროკურატურას მიენიჭა უფლება გამოიძიოს წინა და ახლანდელი სახელმწიფო მოხელეების მიერ ჩადენილი მძიმე კანონდარღვევები. ეს არ არის ცალმხრივი - ჩვენი მთავრობის სოფლის მეურნეობის მინისტრი გათავისუფლებული იქნა თანამდებობიდან და შინაგან საქმეთა მინისტრის მოადგილეს მიესაჯა ერთწლიანი პირობითი სასჯელი ადამიანის პირადი ცხოვრების ხელშეუხებლობის უფლების დარღვევის გამო. რამდენიმე დაბალი რანგის მოხელე და ოფიციალური პირი ასევე მიეცა პასუხისგებაში. მეც საჯაროდ განვაცხადე, რომ თუ თანამდებობაზე ყოფნისას ოდესმე დავარღვევ კანონს, მზად ვარ წავიდე ციხეში", - წერს ღარიბაშვილი.

ანანო კვაჭანტირაძე