საგარეო საქმეთა მინისტრის მოადგილე დავით ზალკალიანი მიიჩნევს, რომ ამერიკელი სენატორების კითხვებს პრემიერ-მინისტრმა საკუთარ წერილში ამომწურავად უპასუხა.

ზალკალიანი ფიქრობს, რომ საქართველოს ხელისუფლების მხრიდან გამოხატული მზაობა აშშ-თან თანამშრომლობაზე ამერიკელი სენატორების მიერ ზუსტად და კარგად იქნება გაგებული.

„კარგია, რომ საქართველოს ხელისუფლებამ და პრემიერმა ამ კითხვებს ამომწურავი პასუხი გასცეს. მნიშვნელოვანია ის ფაქტი, რომ პრემიერ-მინისტრის საპასუხო წერილში ზუსტი აქცენტებია გაკეთებული იმასთან დაკავშირებით, რომ საქართველოს ხელისუფლება არის ღია და გამჭვირვალე ყველა იმ პროცესებში, რომლებიც ქვეყანაში მიმდინარეობს. კერძოდ, მართლმსაჯულების კუთხით. საქართველო ძალიან სერიოზული გამოწვევების წინაშე დგას. უკვე მოვაწერეთ ასოცირების ხელშეკრულებას ხელი. ვახორციელებთ ეკონომიკურ რეფორმებს. აქედან გამომდინარე, ვფიქრობთ, რომ ქვეყნის ხელისუფლების მხრიდან გამოხატული მზაობა აშშ-თან თანამშრომლობაზე იქნება ზუსტად და კარგად გაგებული ამერიკელი სენატორების მიერ“, - განაცხადა ზალკალიანმა.

ნინი კაციტაძე