„ტაბულას“ ხელმძღვანელი თამარ ჩერგოლეიშვილი პრემიერ-მინისტრის მიერ ამერიკელი სენატორებისადმი გაგზავნილ წერილს „ფეისბუქზე“ ეხმაურება.

„ღმერთო მიშველე - გელა ხვედელიძის საქმე მოყავს სენატორებთან, გამართული მართლმსაჯულების და კანონის უზენაესობის დასტურად.

გელა ხვედელიძე, რომელსაც არცერთი დღე არ გაუტარებია ციხეში და ერთწლიანი პირობითი აქვს მისჯილი.

გელა ხვედელიძე, რომელმაც სამსახურეობრივი უფლებამოსილების ბოროტად გამოყენებით დააშანტაჟა მისი კრიტიკოსი და პირადი ცხოვრების ამსახველი მასალა გამოაქვეყნა.

ეს სამარცხვინო საქმე მოყავს მაგალითად. საქმე სადაც არცერთი თანამზრახველი არ გამოვლენილა, თითქოს მინისტრის მოადგილე მარტო მოქმედებდა - გახსნა ვებგვერდი kverckhebi.ge, youtube-ის არხი და ზედ ატვირთა ის, რაც ატვირთა.

როგორ დასცინებენ პრემიერს, არავინ იცის - ამ საქმეზე ცალკე memo გვაქვს შედგენილი“, - წერს ჩერგოლეიშვილი.

ირაკლი ღარიბაშვილმა ამერიკელ სენატორებს წერილით მიმართა. მან სენატორებს რჩევისთვის მადლობა გადაუხადა და თბილისში ყოფილი მაღალჩინოსნების სასამართლო პროცესზე დასაკვირვებლად დაპატიჟა.

პრემიერის წერილში ნათქვამია, რომ ესმის სენატორების მღელვარების იმის თაობაზე, რომ ყოფილი მაღალჩინოსნების სამართლებრივი დევნა შესაძლოა აღქმულ იქნას პოლიტიკურ დევნად. ამავდროულად ირაკლი ღარიბაშვილი ხაზს უსვამს, რომ კანონის უზენაესობა არის მთავარი და ხელისუფლებამ დაუსჯელობის სინდრომის აღმოსაფხვრელად არაერთი ნაბიჯი გადადგა.

ნინი კაციტაძე