საქართველოს პრემიერმინისტრი ირაკლი ღარიბაშვილი რეჯეპ ტაიპ ერდოღანს არჩევნებში გამარჯვებას ულოცავს:

„მინდა გულითადად მოგილოცოთ საპრეზიდენტო არჩევნებში გამარჯვება და გისურვოთ წარმატებები თქვენი ქვეყნისა და ხალხის საკეთილდღეოდ.

არჩევნებმა კიდევ ერთხელ ნათლად წარმოაჩინა თურქეთის მოქალაქეთა მტკიცე მხარდაჭერა თქვენი ხელმძღვანელობით თურქეთის რესპუბლიკაში განხორციელებული რეფორმებისადმი, რომელთა შედეგადაც თურქეთმა დაძლია არაერთი გამოწვევა და მიაღწია ეკონომიკურ წარმატებებს.

საქართველოსათვის განსაკუთრებული მნიშვნელობა აქვს მჭიდრო სახელმწიფოთაშორისი და ხალხთაშორისი კავშირების შემდგომ განვითარებას თურქეთთან. ჩვენთვის ძალზე ფასეულია, რომ წლების მანძილზე განუზომელი წვლილი შეგაქვთ საქართველო-თურქეთის კეთილმეზობლური და პარტნიორული ურთიერთობების გაღრმავებაში. დარწმუნებული ვარ, რომ ჩვენი თანამშრომლობა მომავალში კვლავაც წარმატებულად გაგრძელდება ჩვენი ქვეყნებისა და მთელი რეგიონის საკეთილდღეოდ.

თქვენო აღმატებულებავ, ნება მომეცით კიდევ ერთხელ გადმოგცეთ ჩემი გულწრფელი მოლოცვა და გისურვოთ ყოველივე საუკეთესო“, - ნათქვამია განცხადებაში.