არ დაიწყონ უკანონო მშენებლობა, რადგან ეს საკითხი აუცილებლად გადაიხედება

არ დაიწყონ უკანონო მშენებლობა, რადგან ეს საკითხი აუცილებლად გადაიხედება - ნარმანია

პოლიტიკა - 21:18, 09 Aug, 2014

2602

დღეს თბილისის მერმა, დავით ნარმანიამ საკრებულოს მაჟორიტარ დეპუტატებთან და ქალაქის გამგებლებთან პირველი საკოორდინაციო შეხვედრა გამართა. დავით ნარმანიას განცხადებით, მერია, გამგეობები და მაჟორიტარი დეპუტატების ადგილობრივი ბიუროები კოორდინირებულად იმუშავებენ, რათა არც ერთი მოქალაქის პრობლემა რეაგირების გარეშე არ დარჩეს. მთავარი პრობლემები, რასაც მაჟორიტარი დეპუტატები და გამგებლები გამოყოფენ, სოციალური პირობები, გაუმართავი ინფრასტრუქტურა, საბავშვო ბაღების სიმცირე და უკანონო მშენებლობებია.

ქალაქში მიმდინარე უკანონო მშენებლობებსა და მწვანე საფარის გაჩეხვის ფაქტებთან დაკავშირებით დედაქალაქის მერმა გამგებლებს დაავალა, მომდევნო კვირისთვის რაიონების მიხედვით მერიას სრული ინფორმაცია წარუდგინონ, რის შემდეგაც თითოეული ფაქტის შესწავლა მოხდება. როგორც თბილისის მერმა განაცხადა, გატარდება ქმედითი ღონისძიებები იმისათვის, რომ მშენებლობები მოქალაქეთა ინტერესების შელახვის ხარჯზე არ განხორციელდეს. „მოვუწოდებთ იმ პირებს, რომლებიც უკანონო ან დარღვევით მიღებული ნებართვით აპირებენ მშენებლობის დაწყებას, არ დაიწყონ უკანონო მშენებლობა, რადგან ეს საკითხი აუცილებლად გადაიხედება,“ - განაცხადა დავით ნარმანიამ. რაც შეეხება უკვე დასრულებულ მშენებლობებს, თბილისის მერის განცხადებით, ყველა შემთხვევა ინდივიდუალურად განიხილება, გამოვლენილი დარღვევის შემთხვევაში, დაჯარიმდებიან ის პირები და კომპანიები, ვინც უკანონო მშენებლობა განახორციელეს და დადგება მერიის იმ თანამშრომელთა პასუხისმგებლობის საკითხი, რომლებმაც კანონდარღვევაზე რეაგირება არ მოახდინეს.