მთავრობა მენტალურად უკვე ევრაზიული კავშირშია

მთავრობა მენტალურად უკვე ევრაზიული კავშირშია - მალხაზ პატარაია

სოც.მედია - 16:31, 09 Aug, 2014

2003

უაღრესად აღმაშფოთებელი და საგანგაშოა საგარეო საქმეთა მინისტრის განცხადება, რომ დასავლეთის სანქციები რუსეთის მომართ კრიზისიდან გამოსავალი არ არის. ამასთან ერთად, უკანასკნელ დღეებში ხელისუფალთა მიერ გაკეთებული კაპიტულანტური კომენტარები 2008 წლის აგვისტოს ომის შესახებ და პირდაპირი გამოხტომები მკვეთრი დასავლური გაფრთხილებების მიმართ ოპოზიციის აღვირახსნილი დევნის გამო მიუთითებს იმაზე, რომ ხელისუფლება ღიად და ერთმნიშვნელოვნად დაადგა რუსეთის მეკავშირეობის, პუტინის რუპორის კურსს. შუშის სასახლე ცდილობს ამაში აჯობოს კიდევაც რუსეთის არცთუ მრავალრიცხოვან მოკავშირეებს, რომლებიც საერთაშორისო არენაზე დასავლეთის ქვეყნების და უკრაინის მოვლენების მიმართ უფრო ღირსეულად გამოიყურებიან. ,,დავეწიოთ და გავუსწროთ სომხეთს“,-ალბათ ეს არის ხელისუფლებს ლოზუნგი და რუსეთისადმი ლაქუცში სომხეთი, ბელარუსი თუ ყაზახეთი გაცილებით უკან ჩამოიტოვეს. ასე თავის დროზე იანუკოვიჩიც კი არ იქცეოდა. მთავრობა მენტალურად უკვე ევრაზიული კავშირშია და თუ ასე მივუშვით იურიდიულადაც მალე იქ ამოვყოფთ თავს.

დღეს, როდესაც მსოფლიო როგორც არასოდეს უღრესად სოლიდარულია და გადამჭრელ ღონისძიებებს მიმართავს რუსი კანიბალების წინააღმდეგ, გვეძლევა აფხაზეთისა და ცხინვალის რეგიონის უახლოეს მომავალში დაბრუნების უნიკალური შანსი. ასეთ ვითარებაში ხელისუფლება ცივილიზებული სამყაროსაგან განდგომით, მასთან დაპირისპირებით, მტრის გამოქომაგებით და მის ფეხებქვეშ გართხმით მსოფლიოს წინაშე წარმოგვსახავს მშიშარა, უპრინციპო, უსინდისო და უღირს საზოგადოებად, ხეპრე მონებად და ლაქიებად, რომლებსაც არაფრად უღირთ სამშობლო, არ უნდათ თავისუფლება.

რუსეთი აუცილებლად დამარცხდება, კაცობრიობა მოერევა ახალ შავ ჭირს, უკრაინა გაიმარჯვებს, მაგრამ შემდგომ ზედაც არავინ შემოგვხედავს ბუჩქებში მუხლისკანკალით ჩამალულებსა და თავსლაფდასხმულებს. მთავრობის გამყიდველობაზე არანაკლები დანაშული ჩვენივე დუმილი და გულგრილობაა ამ უმსგავსოებებზე, საშვილიშვილოდ გვარცხვენს ისტორიისა და მომავლის წინაშე. არ შეიძლება ეს დიდიხანს გაგრძელდეს!