ექსპერტი ელენე ხოშტარია სოფლის მეურნეობის მინისტრის განცხადებას ეხმაურება, სადაც ოთარ დანელია ამბობს, რომ სანქციები დადებითად იმოქმედებს რუსეთ-საქართველოს სავაჭრო ურთიერთობებზე.

როგორც „ნიუპოსტთან“ საუბარში ხოშტარია აცხადებს, მთავრობა მსგავსი განცხადებებით ტყუილი მოლოდინის შექმნას ცდილობს, რადგან რუსეთს ნებისმიერი პოლიტიკური მიზეზით შეუძლია საქართველოსთან ეკონომიკური ურთიერთობის გაწყვეტა.

„ის, რომ ეკონომიკური თვალსაზრისით რუსეთის ემბარგო პრობლემა არ არის ეს გამოჩნდა 2006 წლიდან. საქართველოს ეკონომიკამ მოახდინა რეორიენტაცია დასავლეთის ბაზარზე და გააუმჯობესა ხარისხი. თუმცა პრობლემა არის ის, რომ დღევანდელი ხლეისუფლება მოვიდა იმ ლოზუნგით, რომ თითქოს საქართველოს ეკონომიკა დამოკიდებულია რუსეთის ბაზარზე. დიდი ხანია არის საფრთხე, რომ რუსეთმა პოლიტიკური მიზეზებით შეწყვიტოს ეკონომიკური ურთიერთობა საქართველოსთან და მთავრობას უწევს ამის გამართლება, მაგრამ ამ პოლიტკურ განმარტებებს რომ თავი დავანებოთ კარგი იქნება თუ საქართველოს ეკონომიკა ორიენტირებული იქნება ევროპულ ბაზარზე“, - აცხადებს ხოშტარია.

მისი თქმით, რუსეთის ბაზარი არასაიმედოა და ამიტომ საქართველოს ეკონომიკა ორიენტირებული უნდა იყოს ევროპულ ბაზარზე.

„იმას რომ თავი დავანებოთ რომ ვართ ოკუპირებული და რუსეთი არის აგრესორი და დღეს პრაგმატულად ეკონომიკური გათვლა რომ გააკეთო რუსეთზე არის სიბრიყვე. ეს არის აბსოლიტურად გაუთვლელი ბაზარი, რომელიც როდის რას გამოიწვევს კაცმა არ იცის. ბუნებრივია არის არასაიმედო ბაზარი. მთავრობა უნდა მორჩეს ტყუილი მოლოდინების შექმნას ამ ბაზართან დაკავშირებით. იმედია ჩვენი მთავრობა მიხვდება, რომ არც სოფლის მეურნეობა და არც ეკონომიკა რუსეთის ბაზართან მიბმული არ უნდა იყოს“, - აცხადებს ხოშტარია.

რუსულ საინფორმაციო სააგენტოებში გავრცელდა ინფორმაცია, რომ საქართველოს სოფლის მეურნეობის მინისტრი ოთარ დანელია მიიჩნევს, რომ სანქციები დადებითად იმოქმედებს რუსეთ-საქართველოს სავაჭრო ურთიერთობებზე და საქართველოდან რუსეთში ექსპორტის მოთხოვნილებას გაზრდის.