საქართველოს პრეზიდენტი პროკურატურის მიერ საჯაროდ გაცხადებულ საიდუმლო ინფორმაციასთან დაკავშირებით განცხადებას ავრცელებს.

"გამოვთქვამთ შეშფოთებას იმის გამო, რომ პროკურატურამ, სახელმწიფო საიდუმლოების შესახებ საქართველოს კანონის დარღვევით, გაასაჯაროვა საიდუმლო მიმოწერა მთავარ პროკურატურასა და პრეზიდენტის ადმინისტრაციას შორის. სახელმწიფო საიდუმლოების შესახებ საქართველოს კანონის თანახმად, „პრესაში და მასობრივი ინფორმაციების სხვა საშუალებებში სახელმწიფო საიდუმლოების გამჟღავნების შედეგებზე მეთვალყურეობას ახორციელებს საქართველოს შინაგან საქმეთა სამინისტრო“. შესაბამისად, მივმართავთ საქართველოს შინაგან საქმეთა სამინისტროს უზრუნველყოს ზემოაღნიშნული ვალდებულების შესრულება.

დამატებით აღვნიშნავთ, რომ ამავე კანონის მიხედვით, თანამდებობის პირსა და საჯარო მოხელეს, რომელიც დაარღვევს სახელმწიფო საიდუმლოების დაცვის ვალდებულებას, დაეკისრება კანონით დადგენილი პასუხისმგებლობა.

დაბოლოს, საზოგადოებას ვაცნობებთ, რომ პროკურატურის მიერ ნახსენებ დოკუმენტაციას უკვე მოეხსნა გრიფი „საიდუმლო“", - ნათქვამია განცხადებაში.

მედიაში გავრცელდა ინფორმაცია, რომ სახელმწიფო დაცვის სპეციალური სამსახურის საქმეზე გრიფით საიდუმლოს მოხსნის მოთხოვნით, მთავარმა პროკურატურამ პრეზიდენტს მოთხოვნა გადაუგზავნა.

ნინო დათაშვილი