საგარეო საქმეთა მინისტრი მაია ფანჯიკიძე "ნაციონალური მოძრაობის" განცახდებას გამოეხმაურა, რომელმაც საქართველოს ხელისუფლება უკრაინის კრიზისთან დაკავშირებით დასავლელი პარტნიორებისგან განსხვავებული პოზიციის არსებობაში დაადანაშაულა. მინისტრის განცხადებით, ხელისუფლების ოპონენტები ცდილობენ საზოგადოების შეცდომაში შეყვანას, საქართველოს ხლეისუფლება სოლიდარულია უკრაინელი ხალხის მიმართ, გმობს იქ მიმდინარე პროცესებს და მიესალმება საერთაშორისო საზოგადოების ძალისხმევას მოაგვაროს აღნიშნული კრიზისი.

„ჩემმა განცხადებამ არასწორი ინტერპრეტაცია გამოიწვია. ეს ბუნებრივია, რადგან პოლიტკური ოპონენტებისგან ხშირად მიგვიღია არასწორი ინტერპრეტაცია იმ სიტყვებისა რასაც ჩვენ ვამბობთ, ყოველთვის ცდილობენ დაგვაბრალონ ისე რაც სიმართლეს არ შეესაბამება. ამიტომ საჭიროდ ჩავთვალე გამეკეთებინა განმარტება. სანქციების შესახებ დასმულ კითხვას გუშინ ვრცელი პასუხი გავეცი. ვისაუბრე სანქციებზე, რაც ევროკავშირის და ამერიკის შეერთებული შტატების მხრიდან რუსეთის წინააღმდეგ მოქმედებს და ასევე იმ პასუხზე, რაც რუსეთმა სანქციებს გასცა. აღვნიშნე, რომ ეს არ არის საკმარისი იმისთვის, რომ კრიზისი გადაიჭრას და საჭიროა ევროპული უსაფრთხოების სისტემის ფუნდამენტური გადახედვა და ფუნდამენტური დასკვნების გამოტანა. ოპონენტები გვაბრალებენ, თითქოს არ ვართ სოლიდარულები უკრაინის მიმართ. ეს მინდა კატეგორიულად უარვყო“, - განაცხადა მაია ფანჯიკიძემ.