ადვოკატთა ასოციაციის თავმჯდომარის ზაზა ხატიაშვილი დარწმუნებულია, რომ მიხეილ სააკაშვილს საქართველოს „არავინ გადმოსცემს“.

ხატიაშვილის თქმით, სამართალდამცველებს ძალიან გაუჭირდებათ დასავლეთისთვის იმის დამტკიცება, რომ საქმე ეხება სამართლებრივ პროცედურებს და არა პოლიტიკურ ანგარიშწორებას.

ამის მიზეზად ადვოკატთა ასოციაციის თავმჯდომარე პრემიერის მიერ გაკეთებულ განცხადებას ასახელებს, სადაც ღარიბაშვილმა განაცხადა, რომ ექს-პრეზიდენტს პროკურორები ძალით ჩამოიყვანდნენ.

„დარწმუნებული ვარ, რომ სააკაშვილს საქართველოს არავინ გადმოსცემს. თუ გინდა, რომ ყოფილი პრეზიდენტი, რომელიც დასავლურ წრეებში რეფორმატორის იმიჯით სარგებლობს, საქართველოში ჩამოიყვანო, მაშინ შეცდომის დაშვების უფლება არ გაქვს. ჩვენმა პრემიერმა კი შეცდომა უკვე დაუშვა. მან თქვა, რომ თუ ის არ ჩამოვა, მაშინ პროკურორები მას ძალით ჩაიყვანენო.

ეს ხდება მაშინ, როცა პროკურატურას სააკაშვილის წინააღმდეგ ბრალდება წარდგენილი ჯერ არ ჰქონდა. ეს რომ პროკურატურას ეთქვა, ეს ნორმალური იქნებოდა, მაგრამ პრემიერს ამისი უფლება არ აქვს. ამ ფონზე სამართალდამცავებს ძალიან გაუჭირდებათ დასავლეთისთვის იმის დამტკიცება, რომ სამართლებრივ პროცედურებთან გვაქვს საქმე და არა პოლიტიკურ ანგარიშწორებასთან. ღარიბაშვილმა ეს ან არ იცოდა, ან გარიგებასთან გვაქვს საქმე და მან ეს განცხადება მიზანმიმართულად გააკეთა, რათა სააკაშვილს ექსტრადირება არ მომხდარიყო.

ვფიქრობ, რომ სააკაშვილს საქართველოს არ გადმოსცემენ, თუ რა თქმა უნდა არ გაჩნდა ისეთი მტკიცებულებები, რომლითაც სააკაშვილის ბრალეულობა დამტკიცდება, მაგალითად, საკუთარი მოსახლეობის განადგურება. ანუ ისეთი დანაშაულები, რომელიც შესაძლოა განხილული იყოს, როგორც სასამართლოს მიერ“, - აცხადებს ხატიაშვილი გაზეთ „რეზონანსთან“ საუბარში.