ამერიკელი სენატორების მიერ საქართველოს პრემიერმინისტრისთვის გამოგზავნილ წერილთან დაკავშირებით პრემიერის პრესსამსახური განმარტებას აკეთებს. „ნიუპოსტთან“ საუბრისას მანანა თოქმაჯიშვილმა განაცხადა, რომ პრემიერის ოფციალურ გვერდზე წერილების გასაჯაროვება არ ხდება, აღნიშნულ გვერდზე იდება მხოლოდ ოფიციალური განცხადებები და მილოცვები:

„პრემიერის ვებგვერდზე განთავსებულია ხოლმე ოფიციალური მილოცვები ოფიციალური დოკუმენტაცია, რაც შეეხება წერილებს, არაერთი შემოდის დღის განმავლობაში, ეს წერილები არ იდება არც მთავრობის გვერდზე, არც პრემიერის პირად გვერდზე, აქედან გამომდინარე აქ საუბარი არ არის იმაზე, რომ მას ვინმე მალავდა, როგორც აღმოჩნდა, სენატორებს თავად გაუჩნდათ სურვილი და გაასაჯაროვეს. მთავრობის გვერდზე დევს მხოლოდ ოფიციალური განცხადებები და მილოცვები“, - აღნიშნა თოქმაჯიშვილმა.

მისივე განმარტებით, სენატორების წერილს პრემიერმინისტრმა წერილითვე უპასუხა:

„რა თქმა უნდა წერილებზე იგზავნება პასუხები და ამ შემთხვევაშიც მომზადდა პასუხი. თუ სენატორები საჭიროდ ჩათვლიან მის გასაჯაროვებას, ალბათ გაასაჯაროვებენ, ეს უკვე ადრესატზეა დამოკიდებული“, - განაცხადა „ნიუპოსტთან“ საუბრისას მანანა თოქმაჯიშვილმა.

აშშ-ის სენატორებმა ჯეიმს რიშმა, ჯინ შაჰინმა, მარკო რუბიომ და ჯონ მაკკეინმა საქართველოს პრემიერმინისტრს ირაკლი ღარიბაშვილს 1 აგვისტოს წერილით მიმართეს. აღნიშნული წერილი საქართველოს მთავრობას არ გაუსაჯაროებია. მთავრობის ოფიციალურ საიტზე 1 აგვისტოთი მხოლოდ აბაშიძე-კარასინის სატელეფონო საუბრის შესახებ ინფორმაცია თარიღდება.

ანო თორელი