სასტუმრო ქორთიარდ მარიოტში საზღვარგარეთ საქართველოს დიპლომატიური წარმომადგენლობების ხელმძღვანელთა ყოველწლიურ შეკრებაზე - ამბასადორიალი 2014 - სოფლის მეურნეობის მინისტრი ოთარ დანელია სიტყვით გამოვიდა.

საკუთარ გამოსვლაში სოფლის მეურნეობის მინისტრმა სოფლის მეურნეობის დარგში მიღწეულ შედეგებზე ისაუბრა. ოთარ დანელიას განცხადებით, საქართველოს სოფლის მეურნეობის განვითარება მთავრობის ერთ-ერთ ძირითად პრიორიტეტს წარმოადგენს, რადგან დარგში არსებული პოტენციალის მაქსიმალური ათვისება და მიზნობრივი განვითარება ქვეყნის ეკონომიკისთვის სასიცოცხლოდ მნიშვნელოვანია. სწორედ ამიტომ, დადებითი შედეგის მიღწევის უპირველესი გარანტია იქნება მკაფიოდ განსაზღვრული აგრარული პოლიტიკა და სოფლის მეურნეობის სექტორში ფინანსური რესურსების მოზიდვის მნიშვნელოვანი ზრდა.

როგორც სოფლის მეურნეობის მინისტრმა აღნიშნა, ევროკავშირთან ასოცირების შეთანხმების განხორციელების პროცესში, რეფორმები გატარდება კომპლექსურად, ყველა მიმართულებით, განსაკუთრებით სურსათის უვნებლობის სფეროში. იმისათვის, რომ მოხდეს თავისუფალი სავაჭრო სივრცის სრულყოფილი ამოქმედება, საქართველომ ევროკავშირთან მჭიდრო თანამშრომლობით დაიწყო მუშაობა შესაბამისი ღონისძიებების გატარებაზე. ამისათვის მოხდა საქართველოსა და ევროკავშირს შორის ასოცირების დღის წესრიგის მიღება, რომლის მიხედვითაც ორი მხარე აქტიურ დიალოგში იქნება ერთმანეთთან ჩართული DCFTA-ის ეფექტიანი განხორციელებისათვის. ევროკავშირის ექსპერტებთან კონსულტაციების შედეგად და ასოცირების შეთანხმებიდან გამომდინარე, ახალი გამოწვევების გათვალისწინებით, სოფლის მეურნეობის სამინისტროში განხორციელდა სურსათის უვნებლობის ყოვლისმომცველი სტრატეგიისა და საკანონმდებლო დაახლოების პროგრამის გადახედვა. პრიორიტეტების გათვალისწინებით მომზად და პროგრამის პროექტი, რომელიც დაამტკიცა საქართველოს მთავრობამ.

„ასოცირების ხელმოწერის ფარგლებში მნიშვნელოვანია ჩვენი მეგაბარი ქვეყნების გამოცდილების გაზიარება და ევროპული სტანდარტების დანერგვა. შესაბამისად, ამბასადორიალზე საუბარი იყო ყველა პრობლემატურ თემაზე და იმ გამოწვევებზე, რომელთა წინაშეც დღეს ჩვენი ქვეყანა დგას. ჩვენ ძალიან დიდი სამუშაო გვაქვს“.