პრემიერმა ოლიმპიური ფესტივალის ინფრასტრუქტურის მშენებლობა დაათვალიერა

პოლიტიკა - 15:40, 06 Aug, 2014

1740

აქ შენდება ოლიმპიური სტანდარტის აუზი, რომელიც საქართველოში დღემდე არ არსებობდა, სადაც შესაძლებელი იქნება ნებისმიერი მსოფლიო დონის ჩემპიონატის გამართვა, - ამის შესახებ საქართველოს პრემიერ-მინისტრმა ოლიმპიური ინფრასტრუქტურის მშენებლობების დათვალიერების დროს ჟურნალისტებს განუცხადა.

ევროპის ახალგაზრდულ ოლიმპიურ ფესტივალს თბილისი თანამედროვე სტანდარტების კომპლექსებითა და ინფრასტრუქტურით შეხვდება, რომლის მშენებლობა 2015 წლის გაზაფხულზე დასრულდება, - მშენებარე ობიექტები დღეს საქართველოს პრემიერ-მინისტრმა ირაკლი ღარიბაშვილმა დაათვალიერა.

მთავრობის მეთაური წერეთლის გამზირზე, მძლეოსნობის სასახლესა და დიღომში, ე.წ. „ახალი თბილისის" ტერიტორიაზე იმყოფებოდა, სადაც 28 ჰექტარზე სპორტის 4 სხვადასხვა სახეობისთვის განკუთვნილი სპორტული მოედანი და ოლიმპიური სტანდარტების აუზი შენდება.

მიმდინარე სამუშაოების შესახებ ინფორმაცია პრემიერს სპორტისა და ახალგაზრდობის საქმეთა მინისტრმა ლევან ყიფიანმა, ოლიმპიური კომიტეტის თავმჯდომარემ ლერი ხაბელოვმა და ოლიმპიადის საორგანიზაციო კომიტეტის თავმჯდომარემ ალექსი ახვლედიანმა მიაწოდეს.

როგორც ირაკლი ღარიბაშვილმა ჟურნალისტებთან საუბრისას აღნიშნა, საქართველოში მსგავსი მასშტაბის საერთაშორისო სპორტული ღონისძიება არასოდეს ჩატარებულა, რაც ძალიან მნიშვნელოვანია.

პრემიერ-მინისტრის განცხადებით, გარდა იმისა, რომ ოლიმპიური თამაშების დროს, ერთი კვირის განმავლობაში, საქართველო მსოფლიო ყურადღების ცენტრში მოექცევა, ფესტივალი არის საუკეთესო საშუალება ახალგაზრდებში ჯანსაღი ცხოვრების წესის დამკვიდრების პოპულარიზაციისა და მცირე და საშუალო ბიზნესის განვითარებისთვის.

„მშენებლობა დაგეგმილზე ადრე დასრულდება. ჩვენს ქვეყანაში ჩამოვა ძალიან ბევრი სტუმარი. ოლიმპიური ფესტივალის შემდეგ ეს ტერიტორია, რომელიც ეკოლოგიურად ყველაზე სუფთა ადგილია, გახდება „ახალი თბილისი", დედაქალაქს კი ახალი უბანი ექნება. ამავდროულად, აღნიშნული ტერიტორიის ღირებულება იზრდება. აქ იქნება სერიოზული სპორტული ბაზა, მოვამზადებთ ჩემპიონებს და ასევე შენდება ოლიმპიური სტანდარტების აუზი, რომელიც საქართველოში არ არსებობდა", - განაცხადა ირაკლი ღარიბაშვილმა.

მიმდინარე სამუშაოებს პრემიერ-მინისტრი თბილისის მერ დავით ნარმანიასთან ერთად გაეცნო.

ოლიმპიური ფესტივალისთვის შენდება 6 ახალი და რემონტდება 3 არსებული სპორტული ობიექტი; მათ შორის - მძლეოსნობის სტადიონი, ფრენბურთის სასახლე, ტანვარჯიშის სასახლე, აუზი, ტყორცნების მოედანი, ახალი კორტები, ძიუდოს და კალათბურთის სასახლეები.

საქართველოს პრემიერ-მინისტრმა ირაკლი ღარიბაშვილმა თბილისის ზღვაზე მშენებარე ოლიმპიურ სოფელში მიმდინარე სამშენებლო სამუშაოებს დათვალიერებისას განაცხადა, რომ ჩინურ კომპანია „ჰუალინგ ჯგუფთან" დევნილებისთვის 8 კორპუსის შეძენასთან დაკავშირებით მიმდინარეობს მოლაპარაკება, რომლის დასრულების შემდეგ შეძენილი ბინები დევნილებს გადაეცემათ.

პრემიერის განცხადებით, ეს არის ჩინური კომპანიის მიერ განხორციელებული ძალიან საინტერესო ინვესტიცია.

როგორც მთავრობის მეთაურმა აღნიშნა, პროექტის თანახმად 17 კორპუსი აშენდება, საიდანაც 9 ახალგაზრდული ოლიმპიური ფესტივალის სტუმრების დაბინავებას უზრუნველყოფს.

მისივე ინფორმაციით, კომპანიას გააჩნია სხვა საინვესტიციო წინადადებებიც და საქართველოში დამატებით ასობით მილიონის ინვესტირებას აპირებს.

როგორც ჩინური კომპანია „ჰუალინგ ჯგუფის" გენერალურმა მდივანმა ვანგ შენსინიმ ირაკლი ღარიბაშვილს განუმარტა, მშენებლობა 2015 წლის მარტში დასრულდება.

ევროპის ახალგაზრდულ ოლიმპიურ ფესტივალს თბილისი 2015 წლის 25 ივლისიდან 1-ლი აგვისტოს ჩათვლით უმასპინძლებს. ევროპის მე-13 ახალგაზრდული ოლიმპიური თამაშები სპორტის 9 სახეობაში - ველოსპორტში, ჩოგბურთში, სპორტულ ტანვარჯიშში, ხელბურთში, მძლეოსნობაში, კალათბურთში, ცურვაში, ფრენბურთში და ძიუდოში გაიმართება.

საქართველოს დედაქალაქს 49 ქვეყნის ოლიმპიელი და 10 ათასამდე სტუმარი ეწვევა, მედლებისთვის კი 13-დან 18-წლამდე ასაკის 4 ათასზე მეტი სპორტსმენი იბრძოლებს.