თავდაცვის მინისტრი ირაკლი ალასანია ნატო-ს გენერალური მდივნის განცხადებას ეხმაურება, სადაც რასმუსენი რუსეთს საქართველოში, მოლდოვასა და უკრაინაში კონფლიქტის გაღვივებაში ადანაშაულებს. ალასანიას თქმით, აღნიშნული განცხადება ნიშნავს იმას, რომ ნატო-ს სამიტის ძირითადი ნაწილი რუსეთიდან აგრესიის შემთხვევაში რეაქციის ორგანიზებას მიეძღვნება.

“ეს განცხადება ნიშნავს იმას, რომ შემდეგი სამიტის ძირითადი ნაწილი მიეძღვნება რუსეთის აგრესიის შემთხვევაში რეაქციის ორგანიზებას. აქ საუბარია სამხედრო კუთხით. როგორც იცით, 2015-16 და 2017 წლებში ვართ სწრაფი რეაგირების შენაერთების ნაწილი. ჩვენმა შეიარაღებულმა ძალებმა უკვე გაიარა სერთიფიცირება. სწორედ ასე შევიტანთ შეიარაღებული ძალები წვლილს ევროატლანტიკური სივრცის დაცვის საკითხში. მათ შორის იმ შემთხვევაში, თუ რუსეთან სამხედრო დაპირისპირება მოხდება“, - განაცხადა ალასანიამ.

ნატოს გენერალური მდივანი ანდერს ფოგ რასმუსენი რუსეთს საქართველოში, მოლდოვასა და უკრაინაში კონფლიქტის გაღვივებაში ადანაშაულებს.

ამის შესახებ The Financial Times-ში რასმუსენის მიერ გამოქვეყნებულ წერილშია აღნიშნული.

მისი თქმით, საბჭოთა კავშირის შემდეგ ალიანსი ცდილობდა კარგი ურთიერთობა დაემყარებინა მოსკოვთან, რუსეთის პასუხი კი იყო კანონების უგულებელყოფა და კონფლიქტების გაღვივება საქართველოში, მოლდოვასა და უკრაინაში.

ნინი კაციტაძე