ხვალ თბილისში ამბასადორიალი გაიხსნება

პოლიტიკა - 15:07, 03 Aug, 2014

1707

ყოველწლიურ შეკრებაზე სამინისტროს ხელმძღვანელობა და საზღვარგარეთ საქართველოს დიპლომატიური წარმომადგენლები გაწეული საქმიანობას შეაფასებენ და მომავალი წლის სამუშაო გეგმებს დასახვენ.ამბასადორიალის გახსნაზე, რომელიც ფართო ფორმატით ტარდება, მოწვეული არიან საქართველოს საკანონმდებლო, აღმასრულებელი და სასამართლო ხელისუფლების ხელმძღვანელები. დიპლომატების ყოველწლიურ შეკრებას მისასალმებელი სიტყვით გახსნიან საქართველოს პრეზიდენტი, პრემიერ-მინისტრი, პარლამენტის თავმჯდომარე და საგარეო საქმეთა მინისტრი. ამბასადორიალის გახსნაზე მოწვეულია ასევე საქართველოში აკრედიტებული უცხო ქვეყნების დიპლომატიური კორპუსი, საგარეო საქმეთა სამინისტროს ლევან მიქელაძის სახელობის სასწავლო ცენტრის ხელმძღვანელი და სუამ-ის გენერალური მდივანი. საზღვარგარეთ საქართველოს დიპლომატიური მისიების ხელმძღვანელთა ყოველწლიური შეკრება ოთხ დღეს გასტანს. სამუშაო სესიებზე მომხსენებლის სტატუსით, მოწვეულნი არიან საქართველოს აღმასრულებელი და საკანონმდებლო ხელისუფლების წარმომადგენლები, ასევე დამოუკიდებელი უწყებების ხელმძღვანელი პირები. ისინი თემატურ სესიებზე დიპლომატებს მიაწვდიან ინფორმაციას ცალკეული მიმართულებით ქვეყანაში მიმდინარე რეფორმებზე, უწყებებში განხორციელებულ ცალკეულ პროექტებსა და სამომავლო გეგმებზე, უპასუხებენ დიპლომატიური წარმომადგენლობების ხელმძღვანელთა შეკითხვებს და განიხილავენ საგარეო უწყებასთან შემდგომი თანამშრომლობის კონკრეტულ მიმართულებებს. დაგეგმილია ასევე საქართველოს დიპლომატიური კორპუსის შეხვედრა სამოქალაქო სექტორის წარმომადგენლებთან.აბასადორიალი 7 აგვისტოს დასრულდება.

აღსანიშნავია, რომ ამბასადორიალი საქართველოში ყოველწლიურად სექტემბრის პირველ კვირაში ტარდებოდა. წელს ამბასადორიალის ჩატარება დაიგეგმა აგვისტოს თვეში, რათა სექტემბრში, სამუშაო წლის დასაწყისისთვის საზღვარგარეთ საქართველოს თითოეულ დიპლომატიურ წარმომადგენლობას უკვე შემუშავებული ჰქონდეს წლის სამუშაო გეგმა და მიზნები.

ამბასადორიალის პროგრამის პარალელურად განხორციელდება ასევე სპეციალური პროგრამა საზღვარგარეთ საქართველოს დიპლომატიური წარმომადგენლობების ხელმძღვანელთა მეუღლეებისათვის.