ჭირმა თავი არ დამალა... იქნებ აწი მაინც მივხვდეთ, რომ ძალა ერთობაშია

ჭირმა თავი არ დამალა... იქნებ აწი მაინც მივხვდეთ, რომ ძალა ერთობაშია - მალხაზ პატარაია

სოც.მედია - 17:53, 02 Aug, 2014

2436

მოძრაობა ,,დაბრუნების“ თავმჯდომარე მალხაზ პატარაია რუსეთის მხრიდან კავკასიაში მორიგ შეტევაზე საუბრობს. უკანსასკნელი მოვლენების ფონზე, პატარაია საპარლამენტო ოპოზიციას კარჩაკეტილობას და ,,მარტოობაში ბრძოლას“ უწუნებს და ამის სანაცვლოდ, მათ ფართო ანტირუსული პოლიტიკური ფრონტის შექმნის აუცილებლობაზე მიუთითებს.

,,პუტინი შეტევაზე გადმოვიდა კავკასიის ფრონტზე. ბაქოში გამართული საფეხბურთო მატჩის მოვლენები და პრეზიდენტ სააკაშვილისათვის პატიმრობის შეფარდება ამის ორი ძალიან მკაფიო სიგნალია. ეჭვი არ მეპარება, ამ და სხვა ფაქტებზე, განსაკუთრებით წუხანდელზე, პასუხისმგებლობა აუცილებლად დადგება მტერთან თანამშრომლობისათვის ივანიშვილიდან დაწყებული და გუშინდელი მოვლენების ,,გმირი“ მოსამართლით დამთავრებული. ისტორიის ლოგიკა დღეს კრემლის დიქტატორის საწინააღმდეგოდ გამალებით მუშაობს. ჩვენს პატარა უზურპატორსაც არ მოელის კარგი დღე. მაგრამ ეს თავისით არ მოხდება. უკრაინელი ერი იბრძვის, ჩვენ მოვლენების დამკვირვებლად ვრჩებით და თუ ასე გაგრძელდა, ჩვენში ამ შემოტევის დაძლევას დიდი დრო და ფასი დასჭირდება.

ამ ვითარებაზე თავისი წილი პასუხისმგებლობა საპარლამენტო ოპოზიციასაც აქვს. ყოველთვის თავს ვარიდებდი ამის საჯაროდ თქმას, მაგრამ როგორც იტყვიან, ჭირმა თავი არ დამალა. ვერა და ვერ დაძლიეს იზოლაციონიზმი და კარჩაკეტილობა. მარტოობაში ბრძოლა არჩიეს ფართო ანტირუსული პოლიტიკური ფრონტის შექმნას მიუხედავად იმისა, რომ ამისათვის მნიშვნელოვანი წინაპირობები და სერიოზული რესურსები არსებობდა პატრიოტულად და სახელმწიფოებრივად მოაზროვნე ადამიანების, საზოგადოებრივი ჯგუფების თუ გაერთიანებების სახით. გასული არჩევნების შედეგებმაც დაადასტურა ამ მიდგომის უსწორობა. მიუხედავად იმისა, რომ ხელისუფლებას მნიშვნელოვნად მოაკლდა მხარდამჭერები, დასავლური ოპოზიციის ელექტორატი არ გაზრდილა, პირიქით კიდევ უფრო შემცირდა. საზოგადოების დიდი ნაწილი კი გულგრილი დარჩა მიმდინარე პროცესებისადმი და სახლში ჩაიკეტა, რაც მხოლოდ მტრის აქტივშია.

იქნებ აწი მაინც მივხვდეთ, რომ ძალა ერთობაშია“, - წერს მალხაზ პატარაია ,,ფეისბუქის“ გვერდზე.