საქართველოს პარლამენტის თავმჯდომარე დავით უსუფაშვილი უშიშროების საბჭოს სხდომაზე პრემიერმინისტრის დაუსწრებლობის საკითხს ეხმაურება. უსუფაშვილის განმარტებით მან ამის შესახებ შეხვედრაზე მისვლის შემდეგ გაიგო:

“უელსის სამიტზე საქართველო ელის ქვეყნისთვის სასარგებლო და მნიშვნელოვან გადაწყვეტილებებს. დღეს, უშიშროების საბჭოს ფორმატში შესაბამისი მინისტრების მხრიდან დღევანდელი მდგომარეობის ამსახველი ძალიან დეტალური ანგარიში მოვისმინეთ. მთავრობა, პრემიერ-მინისტრი ამ თემაზე ყოველდღიურად მუშაობენ, ამ პროცესებში ჩართულობა ჩვენც გვიწევს, ამიტომ ვიყავით მე და ირაკლი სესიაშვილი სხდომაზე, საქართველოს პრეზიდენტი, რომელიც უელსის სამიტზე დელეგაციის ხელმძღვანელია, ინფორმირებული უნდა იყოს ყველა საკითხზე და ამ მიზნით კოორდინაცია უნდა არსებობდეს. დღევანდელი სხდომით ეს მიზანი მიღწეულია, ყველა საყურადღებო საკითხზე შევჯერდით და მომავლისთვის სამოქმედო გეგმა დავსახეთ, აქ რომ მოვედი მაშინ შევიტყვე, რომ პრემიერი ვერ ახერხებდა მოსვლას, როგორც ჩანს, ის დაკავებულია. ზოგადად, პრემიერ-მინისტრი ის თანამდებობის პირია, რომელსაც არცერთი წუთი არ აქვს თავისუფალი, ალბათ, ასეა”, - განაცხადა უსუფაშვილმა.