თბილისის ყოფილი მერის გიგი უგულავას თქმით, ხელისუფლება ტელეკომპანია „რუსთავი 2“-ზე დარტყმისთვის ემზადება, რის გამოც ცდილობს მიხელ სააკაშვილის საქართველოში ჩამოსვლას ხელი შეუშალოს.

როგორც სასამართლო პროცესზე უგულავამ აღნიშნა, არც მას, არც მიხეილ სააკაშვილს და არც მათი გუნდის სხვა წევრებს ბიძინა ივანიშვილის ქმედებების არ ეშინიათ და მსგავსი ხრიკები მათ ვერ შეაჩერებთ.

„სამართლებრივი ასლი, რომელიც ბიძინა ივანიშვილმა და მისმა მთავრობამ გამოაცხო, ემსახურება აბსოლუტურტად სხვა მიზანს. ქვეყანაში არსებული ეკონომიკური კრიზისის ფონზე, შემოდგომაზე მოხდება ტარიფების გაძვირება. იმის გათვალისწინებით, რომ იზრდება უმუშევრობა, ხელისუფლება ემზადება გადამწყვეტი დარტმისთვის და ამ დარტყმის ობიექტი ტელეკომპანია "რუსთავი 2" იქნება. სწორედ ამ მიზნით არის დადგმული სპექტაკლი, რომ ხალხის მღელვარების ფონზე, ხელისუფლებას სურს, სხვადასხვა ხრიკებით ხელი შეუშალოს მიხეილ სააკაშვილის საქართველოში ჩამოსვლას. მინდა ვუთხრა მათ, რომ ეს ქმედება ვერავის ვერ შეაჩერებს. რაც ყველაზე მთავარია, არც მე, არც მიხეილ სააკაშვილს, არც ჩვენს მეგობრებს არ გვეშინია ბიძინა ივანიშვილისა და ირაკლი ღარიბაშვილის ამ ქმედებების, რადგან მსგავსი ხრიკებით ჩვენ ვერ გაგვაჩერებენ. პროტესტი ახალ ლიდერებს შობს“, - განაცხადა გიგი უგულავამ.

საქალაქო სასამართლოში ტელეკომპანია „იმედისა“ და რიყის საქმეზე დედაქალაქის ყოფილი მერის გიგი უგულავასა და თავდაცვის ყოფილი მინისტრის დავით კეზერაშვილის სასამართლო პროცესი მიმდინარეობს.

დღევანდელ სხდომაზე გაირკვევა დათანხმდება თუ არა პროკურატურა დაცვის მხარის შუამდგომლობას, საუბარია საქმეზე დამატებითი მტკიცებულებების დართვაზე.

ნინი კაციტაძე