რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენელი ზურაბ აბაშიძე არ გამორიცხავს, რომ რუსეთის მხრიდან საქართველოსთან თავისუფალი ვაჭრობის შეთანხმების შეჩერების შემდეგ, გარკვეული პრობლემები შეიქმნას. აბაშიძის თქმით, შესაძლოა, ამ ფაქტის გამო რუსულ ბაზარზე ქართული პროდუქციის გატანა გართულდეს.

„როდესაც ჩვენ ასოცირების ხელშეკრულების ხელმოწერისკენ მივდიოდით და ვაანალიზებდით ჩვენ სავაჭრო ურთიერთობას რუსეთთან, რა თქმა უნდა, ასეთ ვარიანტს არ გამოვრიცხავდით. ჩემი აზრით, ეს გარკვეულ პრობლემებს შექმნის ჩვენს ვაჭრობაში, მაგრამ ამაში ვერანაირ ტრაგედიას ვერ ვხედავ. გარკვეული დისკომფორტი შეიძლება შემოიტანოს ჩვენს სავაჭრო ურთიერთობებში, მაგრამ ეს გადაულახავი სირთულე არ იქნება“, - განაცხადა აბაშიძემ.

რუსეთის ეკონომიკური განვითარების სამინისტრომ მოამზადა რუსეთის მთავრობის დადგენილების პროექტი, რომლის თანახმადაც რუსეთი საქართველოსთან თავისუფალი ვაჭრობის ხელშეკრულებას აჩერებს.

ნინი კაციტაძე