კანონის, თუ დამპყრობლის ნების უზენაესობა

კანონის, თუ დამპყრობლის ნების უზენაესობა - თამარ ჩხეიძე

პოლიტიკა - 22:52, 30 Jul, 2014

3662

,,ყოფილი პრეზიდენტის სააკაშვილის წინააღმდეგ წარმოებულ დევნას არავითარი საერთო არა აქვს რაიმე რეალურ, თუ არარეალურ პრეტენზიებთან, რომელიც ყოფილი ხელისუფლის მიმართ შეიძლება არსებობდეს. მიუხედავად ნაციონალების ხელისუფლებისადმი თვითოეული ჩვენგანის არაერთგვაროვანი დამოკიდებულებისა, ყველა თვალხილული და ქვეყნის მოყვარე ადამიანისთვის ნათელია - ამ შემთხვევაში კანონის უზენაესობაზე ლაპარაკი ცინიზმია, ივანიშვილის პირად საკუთრებაში მყოფი ხელისუფლების წარმომადგენელნი სამარცხვინოდ ასრულებენ ჩვენი მიწების წამრთმევის პუტინის მითითებებს, რითიც უპირველეს ყოვლისა არა ერთი პიროვნების, თუ პოლიტიკური ძალის, (როგორიც არ უნდა იყოს მისდამი ჩვენი დამოკიდებულება) არამედ ჩვენი ქვეყნის ეროვნულ-სახელმწიფოებრივი ინტერესებისთვის ზიანის მიყენებას ცდილობენ. ცნობილია, რომ დღეს მიმდინარეობს გადამწყვეტი ბრძოლა თავისუფალ სამყაროსა და უკვე საერთაშორისო დამნაშავედ ქცეულ პუტინს შორის, ამ ბრძოლაში არა მარტო უკრაინის, საქართველოს ბედიც წყდება. ამ ბრძოლაში სერიოზულადაა ჩართული საქართველოს ყოფილი პრეზიდენტი, რითაც ჩვენი მოწინააღმდეგის გულისწყრომას იწვევს. დღეს, როდესაც პუტინის რუსეთის როლი და აგრესიულობა მთელი ცივილიზებული საზოგადოებისთვის ნათელია, ამ ფონზე ჩვენი მოწინააღმდეგისთვის კიდევ უფრო აქტუალურია მისი მსხვერპლი ქვეყნის პრეზიდენტი გამოცხადდეს ბრალდებულად, შემდეგ დამნაშავედ, გაივლოს ყალბი და ჩვენთვის დამღუპველი შედეგების მომტანი პარალელი ტერიტორიის წართმევით დასჯილ სერბეთთან და მის ლიდერ მილოშევიჩთან, რითაც უნდა მოხდეს აგრესორის გათეთრება, აგრესორის მსხვერპლის დასჯა და მისი მიწების ოკუპაციის ლეგალიზაცია. აი ასეთ ანტიქართულ დივერსიას აწერს ხელს დღეს ვითომც სააკაშვილის წინააღმდეგ სამართლის აღმსრულებელი ხელისუფლება.

კანონი აქ მხოლოდ ზედაპირული, ცინიკური საფარველია, სინამდვილეში საქმე გვაქვს არა კანონის, არამედ საქართველოს არალეგალური მმართველის და მისი პატრონი მტრული სახელმწიფოს მეთაურის დანაშაულებრივი ნების უზენაესობასთან, რომელიც აბსოლუტურად შეუთავსებელია ჩვენი ქვეყნის სასიცოცხლო ინტერესებთან“, - წერს თამარ ჩხეიძე.