ეს იყო არა სარეკლამო, არამედ მოსწავლეებში პოპულარული საგანმანათლებლო არხი

ეს იყო არა სარეკლამო, არამედ მოსწავლეებში პოპულარული საგანმანათლებლო არხი - რას ედავებიან დიმიტრი შაშკინს

პოლიტიკა - 21:49, 30 Jul, 2014

2273

გავრცელებული ინფორმაციით, პროკურატურა „რუსთავი 2“-ს და განათლების სამინისტროს შორის 2012 წელს სარეკლამო მომსახურებასთან დაკავშირებით გაფორმებულ ხელშეკრულებებს სწავლობს. სააგენტო ,,პირველის“ ინფორმაციით, საუბარია “რუსთავი 2”-ისთვის გადარიცხულ მილიონამდე ლარზე, ისე, რომ ამ თანხის მიზნობრიობა არ ჩანს.

,,ნიუპოსტი“ დიმიტრი შაშკინს დაუკავშირდა, ყოფილი მინისტრი განმარტავს, რომ ეს არ იყო სარეკლამო რგოლების განთავსება და საუბარი არ ყოფილა საეთერო დროის ყიდვაზე, არამედ ეს გახლდათ საგანმანათლებლო არხი.

შაშკინის განცხადებით, განათლების სამინისტროსა და ჰოლდინგს შორის, რომელშიც შედის ასევე ტელეკომპანია “რუსთავი 2”, გაფორმდა ხელშეკრულება, რომლის მიხედვითაც, საქართველოში ახალი საგანმანათლებლო არხი შეიქმნა.

,,თუ არ მეშლება, ეს იყო 2011 წელს, ამ არხზე გადიოდა საგანმანათლებლო პროგრამები, განსაკუთრებული აქცენტი კეთდებოდა ისეთ თოქ-შოუებსა და გადაცემებზე, რომლებიც მოსწავლეებს ეროვნული გამოცდებისთვის მომზადებაში ეხმარებოდა. იყო ბევრი უცხოური გადაცემა, რომელიც ქართულ ენაზე ითარგმნებოდა. ამ არხის მეშვეობით შეგეძლოთ, გესწავლათ მათემატიკა, ფიზიკა, ინგლისური და სხვა დისციპლინები“, - აცხადებს შაშკინი. მისივე თქმით, აღნიშნული ხელშეკრულება მარგველაშვილის მინისტრობის დროს 2012 წელს გაუქმდა და ეს არხი დაიხურა.

შაშკინი აღნიშნავს, რომ მოსწავლეებში ეს იყო ძალიან პოპულარული არხი. ყოფილი მინისტრი განმარტავს, რომ აქ საუბარი არ იყო რაიმე სარეკლამო რგოლების განთავსებაზე ან საეთერო დროის ყიდვაზე. ,,ეს არ იყო რეკლამა, არამედ ეს გახლდათ არხი, რომელზეც ჩვენი ბავშვებისთვის საგანმანათლებლო გადაცემები გადიოდა. მე ზუსტად მახსოვს, რომ “ფიფლმეტრებით”, რომელსაც შვედური კომპანია აკეთებდა, ეს არხი მე-3 ადგილზე იყო “რუსთავი 2”-ისა და “იმედის” შემდეგ. ეს არხი განსაკუთრებით პოპულარული იყო იმ ბავშვებში, რომელთაც ფული არ ჰქონდათ ძვირადღირებული რეპეტიტორების ასაყვანად. ამ არხის მეშვეობით ისინი ეროვნული გამოცდებისთვის ემზადებოდნენ. ჩემი, როგორც მინისტრის ამოცანა იყო, რომ განათლება ყველასთვის ხელმისაწვდომი ყოფილიყო. სამწუხაროდ, ახლა რასაც ვხედავთ არის ის, რომ განათლება ხელმისაწვდომია მხოლოდ მათთვის, ვისაც, ბევრი ფული აქვს, რომ რეპეტიტორებში გადაიხადოს. ჩვენ ამას ვებრძოდით და ერთ-ერთი ამ ბრძოლის ელემენტი იყო ეს არხი, რომლის მეშვეობით, რომელთა მშობლებს რეპეტიტორებისთვის გადასახდელი 3-5 ათასი არ ჰქონდათ, ჰქონოდათ შესაძლებლობა, რომ ეროვნული გამოცდებისთვის მომზადებულიყვნენ”, - განაცხადა შაშკინმა.