საპარლამენტო უმრავესობის წევრი, ადამიანის უფლებათა დაცვის კომიტეტის თავმჯდომარე ეკა ბესელია რომეო საჯაიას პასუხობს:

“რომან შამათავა სასამართლომ სცნო დამნაშავედ. ის არ გამართლებულა, სამსახურეობრივი უფლებამოსილების გადამეტების ბრალდებით ის დამნაშავედ იქნა ცნობილი და სწორედ ხურჩის ეპიზოდთან დაკავშირებით სასამართლომ თქვა, რომ იყო დანაშაული ჩადენილი. ხურჩის ეპიზოდის მოწყობა ემსახურებოდა სწორედ იმ მიზანს, რომ მოსახლეობა დაეშინებინათ და ასეთი სცენარით მიზანი იყო არა ტერორისტული აქტის მოწყობა რეალურად, როგორც ეს სასამართლომ ჩათვალა, მიზანი იყო ის, რომ მოსახლეობა ყოფილიყო შიშისა და ტერორის ქვეშ. ამ ნაწილში შამათავა დამნაშავედ არის ცნობილი. იქ კვალიფიკაციის ცვლილება არ ნიშნავს მის გამართლებას და მას მიესაჯა თავისუფლების აღკვეთა. ხურჩის ეპიზოდი იყო მოწყობილი ხელოვნურად და სასამართლომ თქვა, რომ ნამდვილად ადგილი ჰქონდა წინა ხელისუფლების ძალოვანი უწყების მაღალი თანამდებობის პირების ასეთი ტიპის დანაშაულებრივი ფაქტის ჩადენას. რაც შეეხება ადვოკატის უკბილო ხუმრობას, ალბათ, თვითონ გაეცინა, როდესაც ამას ამბობდა. ბოდიშის მოხდა არ უშველით მათ. მათ შორის საჯაიასაც ძალიან ბევრი უკანონო ფაქტთან ჰქონდა შეხება, როდესაც ის როლანდ ახალაიასთან ერთად უკანონოდ ახორციელებდა საპროკურორო საქმიანობას, ასე რომ, ამ საქმეებზეც არსებობს ბევრი კითხვა და ალბათ, ამას დაუბრუნდებიან მოგვიანებით შესაბამისი უწყებები”, - განაცხადა ბესელიამ.

რომეო საჯაიამ მოითხოვა ეკა ბესელიამ საჯარო ბოდიში მოიხადოს, რადგან მან სასამრთლოს განაჩენამდე რომან შამათავა ტერორისტული აქტის ჩადენაში ღიად დაადანაშაულა.

ანო თორელი