დევნილთა მინისტრი სოზარ სუბარი 2007 წლის 7 ნოემბრის მოვლენებს იხსენებს და ადასტურებს, რომ მას ვასილ მაღლაფერიძემ ვანო მერაბიშვილის კაბინეტში ჩატარებული თათბირის შესახებ ინფორმაცია მიაწოდა.

სუბარის თქმით, რომელიც იმ პერიოდში სახალხო დამცველი იყო, 2007 წლის 4 ნოემბერს გაეროში წასვლას აპირებდა, თუმცა ქვეყანაში მიმდინარე მოვლენების გამო დაგეგმილი შეხვედრა გადადო.

“პირველ რიგში, სიტყვიერად მივიღე ეს ინფორმაცია. შესაბამისად, სახალხო დამცველის აპარატი გადავიყვანე სრულ მზადყოფნაში, რათა მონიტორინგი გაძლიერებულიყო და გვქონოდა შესაძლებლობა, რომ ყველა დარღვევა, რაც იმ დროს არსებობდა, დაფიქსირებისა და შესწავლის გარეშე არ დარჩენილიყო. 5 ნოემბერს ეს დოკუმენტი უკვე წერილობითი ფორმით არსებობდა, რომელიც სათარგმნელად იმ დღესვე გადავეცით და 8 ნოემბერს უკვე მაღალი დონის დიპლომატებს გადავეცი”, - განაცხადა სოზარ სუბარმა.

მისი თქმით, დოკუმენტში რომელიც მიაწოდეს საუბარი იყო 4 ნოემბერს ვანო მერაბიშვილის კაბინეტში ჩატარებულ თათბირზე.

„ასევე საუბარი იყო იმაზე, თუ როგორ ჰქნოდათ პირდაპირი დავალება გუბერნატორებს და მაღალი თანამდებობის პირებს, რომ უნდა დაწყებულიყო დევნა, ცემა, ნარკოტიკების ჩადება და იმ ადამიანების ქონების განადგურება, რომლებიც პოლიტიკურად მოწინააღმდეგე ფიგურებს წარმოადგენდნენ. ასე რომ, ინსინუაციები თემაზე, რომ თითქოს რუსი ოლიგარქი გადატრიალებას ამზადებდა, მოგონილია“, - აცხადებს სუბარი.