თავდაცვის მინისტრი ირაკლი ალასანია მიხეილ სააკაშვილისა და ყოფილი მაღალჩინოსნების მიმართ ბრალის წარდგენის ფაქტს ეხმაურება. აალასანიას თქმით. აღნიშნული ფაქტი არის გამაფრთხილებელი ნებისმიერი ხელისუფლებისთვის, რომ თანამდებობა ყველაფრის უფლებას არ ნიშნავს. მინისტრი იმედოვნებს, რომ გამოძიება გამჭირვალედ ჩატარდება და სასამართლო გადაწყვეტილების მიღებისას დამოუკიდებელი იქნება.

„ფაქტია, რომ უმძიმესი დანაშაულების გამოძიებასთან გვაქვს საქმე. ეს ყველაფერი ჩვენს თვალწინ ხდებოდა. განსაკუთრებით აღსანიშნავია ის ფაქტი, რომ შეიარაღებული ძალები იქნა გამოყენებული მოსახლეობის წინააღმდეგ. ველოდები გამოძიებას და მის შედეგებს. მთავარია, რომ გამოძიება იყოს გამჭრვალე და სასამართლო - დამოუკიდებელი. ასევე მნიშვნელოვანია, რომ ეჭვმიტანილების დაცვის უფლება უნდა იყოს გარანტირებული, რადგან არავის, მათ შორის ჩვენს პარტნიორებს, არ ჰქონდეთ იმის განცდა, რომ აქ პოლიტიკური მოტივაციაა. ეს არის გამაფრთხილებელი, პირველ რიგში, ჩვენი ხელისუფლებისთვის, რომ თანამდებობაზე ყოფნა ყველაფრის უფლებას არ ნიშნავს“, - განაცხადა ალასანიამ.

თავდაცვის მინისტრი ამერიკელი სენატორების მიერ გავრცელებულ განცხადებასაც გამოეხმაურა.

„ძალიან დიდ პატვს ვცემს ჩვენ მეგობარ სენატორებს. მესმის, რომ მათ აქვთ შეშფოთებები, მაგრამ დაელოდნონ გამოძიებას და პატივი სცენ საქართველოს კანონებს“, - განაცხადა ალასანიამ.

მიხეილ სააკაშვილი ბრალდებულის სახით სისხლის სამართლის პასუხისგებაში გუშინ მიეცა. საქმე ეხება 2007 წლის 7 ნოემბერს მომიტინგეთა დარბევას, ტელეკომპანია "იმედში" შეჭრას და არკადი პატარკაციშვილის ქონების დანაშაულებრივად ხელში ჩაგდებას. სააკშვილთან ერთად ბრალდებულები არიან ვანო მერაბიშვილ, დავით კეზერაშვილი და გიგი უგულავა.

აღნიშნულთან დაკავშირებით ამერიკელმა სენატორებმა განცხადება გაავრცელეს. როგორც განცხადებაშია აღნიშნული, სენატორები შეშფოთებულები არიან, რომ საქართველოს მთავარმა პროკურორმა ბრალი წარუდგინა პრეზიდენტ მიხეილ სააკაშვილს და წინა ხელისუფლების მრავალ ლიდერს.

ნინო დათაშვილი