„ერთიანი ნაციონალური მოძრაობის“ ცენტრალურ ოფისში საპარლამენტო უმცირესობის ლიდერმა დავით ბაქრაძემ საგანგებო ბრიფინგი გამართა, სადაც მან მიხეილ სააკაშვილის დაკითხვაზე დაბარებისა და მისთვის ბრალის წარდგენაზე განცხადება გააკეთა:

„დღეს ხელისუფლებამ გადადგა მორიგი ნაბიჯი დაანონსებული ცხელი ზაფხულისკენ, პროკურატურის წარმომადგენლებმა ჩვენს საზოგადოებას ძალიან დეტალურად შეახსენეს, ჩვენი უახლოესი ისტორიის მძიმე და დრამატული ფურცელი, ნეგატიური ემოციებით შეეცადნენ გადაეფარათ ის სიჩქარე და არაკვალიფიციური მუშაობა, რომელითაც მოქმედებს საქართველოს გენერალური პროკურატურა და სამართალდამცავი უწყება.

ხელისუფლება ჩქარობს, ვინაიდან მათ არ დაიცვეს ელემენტარული წესები, რომელიც გულისხმობს მოწმის იძულებით, დაკითხვაზე მიყვანას, ხელისუფლება ჩქარობს, იმიტომ, რომ მათ არ მისცეს მათივე ჩამოყვანილ საერთაშორისო ექსპერტებს მუშაობის საშუალება.

ხელისუფლება ჩქარობს და ამ სიჩქარეს აქვს ერთადერთი გამართლება, ხელისუფლება ჩქარობს, იმიტომ, რომ მას ეშინია „ნაციონალური მოძრაობის“, როგორც მთავარი ოპოზიციური ძალის“, - განაცხადა დავით ბაქრაძემ.

ანანო კვაჭანტირაძე