რა გარიგება იყო 2007 წელს პატარკაციშვილსა და ხელისუფლებას შორის

რა გარიგება იყო 2007 წელს პატარკაციშვილსა და ხელისუფლებას შორის - რას ჰყვება ხუხაშვილი

პოლიტიკა - 16:35, 28 Jul, 2014

2970

ექსპერტი გია ხუხაშვილი „ნიუპოსტთან“ საუბარში 2007 წლის მოვლენებს იხსენებს და იმ გარიგებაზე საუბრობს, რომელიც, მისივე თქმით, ხელისუფლებასა და ბადრი პატარკაციშვილს შორის ტელეკომპანია „იმედის“ დარბევამდე არსებობდა.

„წავიკითხე პროკურატურის ბრალდება, ყველაფერი რა თქმა უნდა სწორად არის მოცემული, თუმცა არის იქ რაღაც ნიუანსები, ბადრი პატარკაციშვილსა და მიხეილ სააკაშვილს შორის „იმედის“ რკინიგზაზე გაცვლასთან დაკავშირებით. ნიუანსები, ცოტა სხვანაირად იყო, მე თვითონ ბადრისგან მაქვს ამის შესახებ ინფორმაცია. პრინციპში, ეს უკავშირდება „იმედს“, მაგრამ მანდ გაცვლაზე არ იყო საუბარი“,- აღნიშნა გია ხუხაშვილმა.

ხუხაშვილი „ნიუპოსტთან“ სატელეფონო კომენტარში აცხადებს, რომ გარიგება ითვალისწინება არა „იმედის“ და რკინიგზის გაცვლას, არამედ ერთობლივი კომპანიის შექმნას.

„საუბარი იყო იმაზე, რომ კი არ გაეცვალათ, არამედ გაკეთებულიყო ერთობლივი კომპანია, ანუ ხელისუფლება ბადრის პარტნიორობაზე ესაუბრებოდა, რომელშიც აქტივების სახით იქნებოდა ხელისუფლების მხრიდან რკინიგზა და ბადრის მხრიდან - „იმედი“ და კიდევ სხვა აქტივები და გარიგების მიზანი იყო ამ ერთობლივი კომპანიის ფარგლებში გამხდარიყვნენ პარტიონრები, რაზეც ბადრიმ საბოლოო ჯამში თქვა უარი“,- ამბობს ექსპერტი გია ხუხაშვილი და დასძენს, რომ აღნიშნულ ინფორმაციას ის პირადად ბადრი პატარკაციშვილისგან ფლობს.

ხუხუაშვილი იხსენებს, რომ ბიზნესმენსა და მას შორის ეს საუბარი 2007 წლის ზაფხულში შედგა, ანუ მაშინ, როდესაც უშუალოდ ხელისუფლება პატარკაციშვილის გარიგების პირობებს აცნობდა.

„აქამდე ეს არ გამიხმოვანებია, მე ასეთ რაღაცეებს არ ვახმოვანებ, თუ ვინმე დაინტერესდება მხოლოდ მაგ შემთხვევაში...ეს ამ საქმეში არსებითად არაფერს არ ცვლის, მაგრამ ზოგადად ეს საინტერესო თემაა, თუ რა ტიპის გარიგებას სთავაზობდა ხელისუფლება ბადრი პატარკაციშვილს, ცოტა უფრო სხვა გარიგებას ჰქონდა საქმე, ყოველშემთხვევაში ბადრი როგორც მეუბნებოდა“,- ამბობს ხუხაშვილი.

ხუხაშვილი „ნიუპოსტთან“ საუბარში აღნიშნავს, რომ პატარკაციშვილს მაშინ სააკაშვილთან გარიგება არ ურჩია.

„ჩემი რეკომენდაციაც იყო მის მიმართ, რომ სააკაშვილთან გარიგებაში შესვლა ბევრი მიზეზის გამო არ შეიძლებოდა. ამის შემდეგ ბადრიმ ჩაშალა ეს გარიგება და ამ გარიგების ჩაშლა გახდა საფუძველი მისთვის ხელიუფლების მხრიდან ომის გამოცხადებისა, რაც აი, ასე ტრაგიკულად დასრულდა“,- განაცხადა ექსპერტმა.

ნინა გოლოშვილი