მოწმის სტატუსი სატყუარა იყო, მათ იცოდნენ რომ სააკაშვილს ბრალს წაუყენებდნენ

მოწმის სტატუსი სატყუარა იყო, მათ იცოდნენ რომ სააკაშვილს ბრალს წაუყენებდნენ - ნუგზარ წიკლაური

პოლიტიკა - 14:40, 28 Jul, 2014

1748

საქართველოს ექს-პრეზიდენტისთვის ბრალის წარდგენას „ნაციონალური მოძრაობის“ წევრი ნუგზარ წიკლაური ეხმაურება. „ნიუპოსტთან“ საუბარში წიკლაური აღნიშნულ ფაქტს პოლიტიკურად მოტივირებულ უწოდებს და აცხადებს, რომ ხელისუფლებას პოლიტიკური მოწინააღმდეგის ციხეში გამოკეტვა აქვს გადაწყვეტილი.

„ხელისუფლებას პოლიტიკური მოწინააღმდეგის ციხეში გამოკეტვა აქვთ გადაწყვეტილი. ხელისუფლება მთელ ენერგიას მიმართავს სხვადასხვა პრობლემების მოგვარებისკენ, არამედ - პოლიტიკური დევნისკენ. გუშინ მიხეილ სააკაშვილი დაიბარეს მოწმის სტატუსით, დღეს წაუყენეს ბრალი. გუშინაც შესანიშნავად იცოდნენ, რომ დღეს ბრალის წაყენებას აპირებდნენ. ამიტომ, ეს მოწმის სტატუსით დაბარება ერთგვარი სატყუარა იყო. ამ ყველაფერმა დაადასტურა ეჭვი იმასთან დაკავშირებით, რომ ეს საქმეები პოლიტკურად მოტივირებულია. ეს არის ერთვარი პასუხი ადგილობრივი თვითმმართველობის არჩევნებზე, სადაც „ნაციონალურ მოძრაობას“ სხვადასვხა რაიონში 30%-ზე მეტი ჰვქონდა. ამან ხელისუფლება შეაშფოთა და გადაწყვიტეს მთელი ძალისხმევა მიმართონ პოლიტიკური მოწინააღმდეგეების საქმიანობის ნეიტრალიზაციისკენ და ამისათვის გამოიყენონ პროკურატურა“, - განაცხადა ნუგზარ წიკლაურმა.

პროკურატურამ მიხეილ სააკაშვილს ბრალი ცოტა ხნის წინ წარუდგინა. საქმე ეხება 2007 წლის 07 ნოემბერს, მომიტინგეთა მასობრივად დარბევას, ტელეკომპანია იმედში შეჭრას და არკადი პატარკაციშვილის კუთვნილი ქონების დანაშაულებრივად ხელში ჩაგდებას. მიხეილ სააკაშვილთან ერთად, ბრალდების შესახებ დადგენილებები იქნა გამოტანილი: შინაგან საქმეთა ყოფილი მინისტრის ივანე მერაბიშვილის, ყოფილი გენერალური პროკურორის ზურაბ ადეიშვილის, თავდაცვის ყოფილი მინისტრის დავით კეზერაშვილის და თბილისის ყოფილი მერის გიორგი უგულავას მიმართ.